जोर्डनलिसे वाफ वुमन्स च्याम्पियनसिप फुटबल अन्तर्गत नेपालं थौं उपाधिया लागिं जोर्डनलिसे म्हितेत्यंगु दु ।

नेपाल व जोर्डन दथुइया उपाधि धेंधें बल्लाः थौं साउदी अरबया जेद्धा जुइत्यंगु दु । थौंया फाइनल कासा नेपाली ई कथं बहनी ९ः४५ य् न्ह्याइ ।

फाइनलय् चुलिंचू लायेत्यंगु निगू टिम नेपाल व जोर्डन आःतक अपराजित हे तिनि । सेमिफाइनलय् लेबनानयात २–१ गोलं बुकाः नेपाल फाइनल थ्यंगु खःसा जोर्डनं प्यालेस्टाइनयात ५–० या तःधंगु गोल अन्तरं बुकाः फाइनल यात्रा पक्का याःगु खः ।

थौंया कासा त्याकाः उपाधि ल्ह्वनेगु आज्जुइ दुगु नेपालयात थौंया कासा उलि अःपुइगु धाःसा खनेमदु ।

थौंया कासाय् नेपाल प्रतियोगिताय् दकले अप्वः गोल याःम्ह सावित्रा भण्डारी (साम्वा) मदयक हे म्हिते मालीगु जूगु दु । फ्रान्सय् जुइत्यंगु मिसा फुटबलया सर्वोच्च लिग म्हितेत उखेपाखे वंगु जूगुलिं नेपाली टिमय् थौं सावित्रा दइमखु ।

उकिया नापं जोर्डन थुगु प्रतियोगिताया त्याकामि नं खःसा दकले सफल टिम कथं नं कयातःगु दु । जोर्डनं थ्व प्रतियोगीताया उपाधि न्याकः त्याकेधुंकल ।

फिफा वरियताय् नेपाली मिसा टिम १०५ थासय् दुसा जोर्डन ७४ थासय् दु ।