पूर्णकाजी ज्यापु व मीना प्रजापतिं हालातःगु म्ये ‘ताखोता ताखोता ध्यां ध्यां’ पिदंगु दु ।

म्येया रचनाकार तकं खःम्ह म्येहालामि पूर्णकाजीया हे युट्युब च्यानलमार्फत थुगु ज्वःम्ये थौं (सोमबाः) सार्वजनिक जूगु खः ।

वयां न्ह्यः म्हिगः आइतबाः येँय् छगू ज्याझ्वः यानां म्येया लोकार्पण याःगु खः ।

ज्याझ्वलय् नेपाःया दकले न्हापांम्ह मातृभाषी प्लेब्याक सिंगर जुजुकाजी रंजितं म्ये उलेज्या यानादिल ।

ज्याझ्वलय् न्ववासें नेपाःया न्हापांगु मातृभाषी संकिपा सिलुया प्लेब्याक सिंगर रंजितं न्हू पुस्ताया न्हू कथंया म्यें यानां नेवाः भाय् मल्हाइपिं नेवाःतलिसें गैर नेवाःतयत तकं नेवाः म्ये हायेकेगु लकस दयेकाच्वंगु लसताया खँ खःगु धयादिल ।

‘थौंकन्हय् वयाच्वंगु म्यें नेवाः भाय् मल्हाइपिन्त नेवाः म्ये हायेकेगु वातावरण दयेकाब्यूगु दु । नेवाः संगीत ख्यलय् थौंकन्हयया न्हू पहःया म्यें छगू न्हूगु उर्जा हयाब्यूगु दु, थुकी जि तसकं लयताः’ रंजितया धापू खः ।

म्येहालामि मीनां म्ये बांलाकेत थम्हं याये फक्व कुतः यानां म्ये दर्शक, श्रोतायात लःल्हायेधुनागु धासें हःपाः तिबः बियादीत इनाप यानादिल ।

ज्याझ्वलय् चःमति सहकारीया नायः मन्दिरा महर्जन, येँ महानगर पालिकाया पूर्वप्रमुख विद्यासुन्दर शाक्य, म्ये च्वमिलिसें हालामि पूर्णकाजी ज्यापु, निर्देशक रोहिया महर्जनलिसें नं नुगः खँ तयादीगु खः ।

म्येयात जुगल डंगोलं लसय् हनादीगु दु । थुगु म्येया म्यूजिक भिडियो नांजाःम्ह कोरियोग्राफर रोहिया महर्जनं निर्देशन यानादीगु दु ।

सितु महर्जंन व सुदिप श्रेष्ठं अभिनय यानादीगु म्येयात छायाङ्कन व दृश्य सम्पादन पवन सुस्लिङ्गं यानादीगु दु ।