स्वनिगःव्यापि ‘मुनासः ख्यालः कासा’य् ‘कयता तंम्ह नेवाः’ ख्यालकं नेपाल भाषा सिनेमा विकास केन्द्र न्हाप सिरपाः त्याकूगु दु ।

न्हाप सिरपाः त्याकाः नेपालभाषा सिनेमा विकास केन्द्रं तका सिरपाः ५०द्वः तका नं ल्हातय् लाकूगु दु ।

थुगु हे ख्यालकं निर्देशक आर्यम नकःमिं उत्कृष्ट निर्देशक व च्वमि गणेशराम लाछिं उत्कृष्ट ख्यालः च्वमिया सिरपाः त्याकूगु दु ।

कासाय् ख्वप सांस्कृतिक खलःया ‘थ्व छु जूगु?’ ल्यू, थेच्व सांस्कृतिक मंका खलःया ‘इमर्जेन्सी श्राद्ध’ लियांल्यू लात सा प्रथमाञ्जली नासः खलःया ‘छन्त नं थथे याये यःला’ ख्यालकं हःपाः सिरपाः त्याकूगु दु ।

ल्यू, लियांल्यू व हःपाः सिरपाः त्याकूगु ख्यालकं छसिकथं ३०द्वः, २०द्वः व १०द्वः तका सिरपाः नं त्याकूगु दु ।

दकले बांलाःम्ह ख्यालिम्वःया सिरपाः धाःसा ‘छन्त नं थथे याये यःला’पाखें उमेश स्थापितं त्याकायंकूगु दु ।

थ्व कासाय् उत्कृष्ट मिसा ख्यालिम्वःया सिरपाः ‘ईमर्जेन्सी श्राद्ध’या शान्ता महर्जन, उत्कृष्ट समाः ‘छन्त नं थथे याये यःला’या मीरा डंगोल व उत्कृष्ट दबू छायेपा ‘ह्विलचियरं ‘कुतुंवःम्ह नेवाः’या कविन महर्जनं त्याकूगु दु ।

साहित्यकार व नाट्य निर्देशक रमेशकाजी स्थापित संयोजक दुगु कासाया निर्णायक मण्डलय् जन संगीत स्रष्टा अमरराज शर्मा राजोपाध्याय, वरिष्ठ अभिनेता राजेन्द्र मान शाक्य व गणेश सायमि, साहित्यकार शम्भु राम श्रेष्ठ दुजः दुगु खः ।

मुनासःया ग्वसालय् वंगु मंगलबाः व बुधबाः निन्हुयंक येँया नेपाल पुलिस क्लबय् ख्यालः कासा जूगु खः ।