वरिष्ठ कलाकार ख्यालि जुजु मदनकृष्ण श्रेष्ठयात सम्मान यासें नेवाः देय् दबू जामाच्व नगर समितिया न्हूदँया भिन्तुना ज्याझ्वः क्वचाःगु दु ।

देय् जामाच्व नगर समितिं नेपाल संवत् ११४७ न्हूदँया लसताय् हरसिद्धि मन्दिर प्राङ्गण सितापाईलाय् ‘भिन्तुना कालबिल नापं साँस्कृतिक ज्याझ्वः’या ग्वसाः ग्वःगु खः ।

उगु हे ज्याझ्वलय् वरिष्ठ कलाकार मदनकृष्ण श्रेष्ठयात न्वाः सभ्यता संरक्षणय् मूवंगु योगदान ब्यूगु धासें ख्यालि जुजु श्रेष्ठयात सम्मान याःगु खः ।

ख्यालि जुजु श्रेष्ठयात उर्जा जलश्रोत तथा सिचाई मन्त्री विराजभक्त श्रेष्ठं हनापौ लःल्हासें सम्मान याःगु खः ।

नुगः खँ तयेगु झ्वलय् देय् दबू जामाच्व नगर समितिया वरिष्ठ न्वकू विश्वराम बलामीं नगर समितिं यानावःगु ज्याझ्वः व गतिविधिया बारे कनादिल ।

नेवाः देय् दबू केन्द्रीय समितिया मूछ्यान्जे श्रीकृष्ण महर्जनं नेपाल संवतया छ्यला व महत्त्वबारे जः ह्वलादीगु खः ।

जामाच्व नगर समितिया नायः अजित पुतुवारं समितिं ताः इलंनिसें नागार्जुन नगरपालिकाया नामय् नेवाः स्थाननां जामाच्व नगरपालिका च्वकेगु व छ्ययेकेबीगु नितिं नगरपालिकाया ध्यानाकर्षण याकावयागु धयादिल ।

ज्याझ्वलय् बागमती प्रदेश सभासदपिं उद्धव थापा, केशव पोखरेल, नागार्जुन नगरपालिका कार्यवाहक मेयर शुसिला अधिकारी, नगर प्रवक्ता महेश रिमाल अले वडाध्यक्षपिनिगु उपस्थिती दुगु खः ।

ज्याझ्वलय् थीथी कलाकारपिन्सं वाद्यवादन, म्येलिसेंया न्ह्यब्वया नं न्ह्यब्वःगु खः ।

नगर समितिं थगुनेनिसें नगर स्तरीय भिंतुना ज्याझ्वः यानावःगु खः ।