न्हूदँ नेपाल सम्वत ११४७ या लसताय् अष्ट्रेलियाया एडिलेडय् गुथि एसएं मंकाः म्हपूजा व न्हूदँ समारोहया ग्वसाः ग्वःगु दु ।

चीचिधिकःपिं मचातलिसें ज्याथः नागरिकतक यानां करिब ७५म्हेसिया सहभागिताय् ज्याझ्वः जूगु खः ।

ज्याझ्वलय् ब्वतिमितयसं तःजिक मंकाः म्हपूजा याःगु खः । ज्याझ्वलय् सिड्नी व पर्थं तकं नेपाःमिपिनिगु ब्वति दुगु खः ।

ज्याझ्वलय् नेपाल संवत् ११४७यात लसकुस यासें ब्वतिमितयसं थवंथवय् न्हूदँया भिंतुना कालबिल याःगु खः ।

विदेशय् च्वनां नं थःगु मौलिक भाय्, तजिलजि, परम्परा व नखःचखःया संरक्षण अले निरन्तरताया नितिं गुथि एसएं यानावःगु कुतःयात च्वछाःगु खः ।

कार्तिक शुक्ल प्रतिपदाया दिनय् याइगु म्हपूजाय् थःगु हे प्रतिकया रुपं मन्दः दयेकाः मन्दःयात पूजा यायेगु याइ । थ्व हे दिनय् नेपाल सम्वतया न्हूगु दँ नं न्ह्याइ ।