यल । थुगुसीया कात्ति प्याखंया ज्याझ्वः धलः पिदंगु दु । य

ल मंगलय् दँयदसं क्यनीगु हलिमय् नांजाःगु कात्ति प्याखं थुगुसी वइगु ने.सं. ११४७ कछलाथ्व चतुर्थी (कार्तिक २७) निसें न्ह्याइगु जूगु दु ।

थुगुसीया कात्ति प्याखंया न्हापांगु दिं कछलाथ्व चतुर्थी (कार्तिक २७) शुक्रबाःकुन्हु मंगलबजारस्थित कात्ति दबुलिइ ‘भक्त सुरदास’ प्याखं न्ह्यबवइ ।

वयां कन्हयकुन्हु कछलाथ्व ५ (कार्तिक २८) शनिबाः माधवानर लीला अन्तर्गत गोपिचन्द्रया बाखं व कछलाथ्व ६ (कार्तिक २९) आइतबा माधवानर लीला अन्तर्गत नै जुजु कामसेनया बाखं न्ह्यब्वइ ।

कछलाथ्व ७ (कार्तिक ३०) सोमबाः माधवानर लीलाय् देवी प्याखं व कछलाथ्व ८ (मंसीर १) मंगलबाः माधवानर लीलाया हे जुजु विक्रमादीत्यया बाखं क्यनी ।

कछलाथ्व ९ (मंसीर २) बुधबाः बाथः प्याखनय् च्वलय् खुदां दां खुदां व कछलाथ्व १० (मंसीर ३) बिहिबाः नं बाथः प्याखनय् हे कौला खिचा प्याखं क्यनी । बाथः प्याखं कात्ति प्याखंया नांजाःगु व रोचक प्याखं दुने लाः ।

कछलाथ्व ११ (मंसीर ४) शुक्रबाःया दिनय् जल शयण (मधुकैटव बध) कछलाथ्व १२ (मंसीर ५) शनिबाः वराह अवतार हिरण्याक्ष वध प्याखं क्यनी ।

कात्ति प्याखंया दकले नांजाःगु व रोमाञ्चक प्याखं नृसिंह अवतार (हिरण्यकश्यपु वध) कछलाथ्व १३ (मंसीर ५) शनिबाः क्यनेत्यंगु दु ।

कछलाथ्व १४ (मंसीर ७) सोमबाःकुन्हु वस्त्रहरण लीला क्यनी सा कछलाथ्व १५ (मंसीर ८) मंगलबाःकुन्हु दधि लीला प्याखं न्ह्यब्वयालिसें थुगुसीया कात्ति प्याखं क्वचाइ ।

थुगु दक्वं प्याखंत हरेक दिनय् मंगलबजारया कात्ति दबुलिइ बहनी ७ताः इलंनिसें न्ह्याइगु कार्तिक नाच संरक्षण समितिं धाःगु दु ।

मल्लकालय् यलया जुजु सिद्धिनरसिंह मल्लं नेपाल सम्वत ७६१इ कात्ति प्याखं न्ह्याकेब्यूगु खः ।

३८६ दँनिसेंया इतिहास कुबियातःगु थुगु कात्ति प्याखं थौंतक नं दँयदसं छकः नं त्वाःमदःसे निरन्तर न्ह्यानावःगु कार्तिक नाच संरक्षण समितिं धयावःगु दु । लिसें थुकियात हलिंया पुलांगु नाट्य परम्पराया रुपं नं दावी यानावःगु दु ।