येँ । येँ महानगरपालिकां वइगु माघ १ गते घ्यःचाकु संल्हूया दिनय् स्वयम्भूया भूइख्यलय् ग्वसाः ग्वयेत्यंगु सम्यक् महादानया लागिं राष्ट्रपति रामचन्द्र पौडेलयात ग्वयदां तःगु दु ।

ग्वयदां तःवनेत विहिबाः स्वयम्भूइ शास्त्रीय विधि कथं पूजा याःगु खः । व झ्वलय् स्वयम्भूइ दुगु शान्तिपुर, बसुधरा (बसुन्धरा), महामञ्जुश्री, सम्यकय् हइगु अमिताभ, बिजेश्वरी योगिनी, अबलोकितेश्वर (जनबहाःद्यः) या विधिवत् पूजा याःगु खः ।

स्वयम्भूइ प्रा. डा. नरेशमान बज्राचार्यया धर्माधिकारत्वय् मूल आचार्य मञ्जुश्रीरत्न बज्राचार्य, उपाध्याय भीमरत्न बज्राचार्य, कर्माचार्य यशरत्न बज्राचार्य व सहायक गुरु बज्राचार्य व सहायक गुरुमांपिन्सं ग्वयदां पूजा याःगु खः ।

ग्वयदां पूजालिसें समारोह समितिया मू कजि डंगोलं घण्टाघोषण यानादीगु खः । स्वयम्भूं सम्बन्धित सकसित ब्यूगु निमन्त्रणा वाचनयात घण्टाघोषण धायेगु याइ ।

सम्यक महादानय् वयेगु नितिं सांस्कृतिक व प्रशासनिक रुपं ब्वना मथ्यंपिं सकसिनं स्वयम्भूं याइगु घण्टाघोषणं थःत ब्वना वःगु नालाकायेगु चलन दु ।

व धुंकाः नेपाली सेना, नेपाल प्रहरी र सशस्त्र प्रहरीको राजकीय बाजा तथा धिमे र गुँला बाजंलिसें राष्ट्रपति ज्याकू शीतल निवास वनां सम्यक् महादान मूल समारोह समितिया कजि सुनिता डंगोलं ग्वयदां तयादीगु खः ।

व झ्वलय् मूल समारोह समिति, वडाध्यक्ष अले कार्यपालिका दुजःत, सम्यक् महादान कार्यान्वयन समिति, उपसमिति, महानगरपालिकाका विभागीय प्रमुखलिसेंया टोली, राष्ट्रपति भवन वंगु खः ।

ग्वयदां तयेगु झ्वलय् महानगरपालिकाया कार्यवाहक प्रमुखलिसें मूल समारोह समितिया मू कजि डंगोलं ब्वनापौ ब्वनांलि राष्ट्रपतियात लःल्हानादीगु खः ।