येँ/नेपाःया संगीत ख्यलय् नांजाःम्ह म्येहालामि भीम तुलाधरलिसें झिम्हेसिया सलय् ‘मोहनि नखः वल’ म्ये सार्वजनिक जूगु दु । शनिबाः येँय् छगू ज्याझ्वःया दथुइ उगु म्योया म्यूजिक भिडियो सार्वजनिक याःगु खः ।

ज्याझ्वलय् न्ववासें म्यहोलामिलिसें मोहनि नखः म्येया लयचिनामि तुलाधरं नेवाः भाय्, कला, तजिलजिया उत्थान, संरक्षण अले प्रवर्ध्दनया लागिं थः संगीत ख्यःमार्फत निरन्तर न्ह्यज्यानाच्वनागु धासें हःपाः, तिबः व ग्वाहालिया नितिं सकसित इनाप यानादिल ।

‘जात्रा, नखःचखःलिसेंया झीगु तजिलजि पुस्तान्तरणया लागिं संगीत छगू बांलाःगु माध्यम जुइफु । छगू कुतः खः, तजिलजिया संरक्षण व पुस्तान्तरणय् । छिकपिनिगु साथ व ग्वाहालिया आशा तयाच्वना’ म्येहालामि तुलाधरं धयादिल ।

अथेहे, नेपालभाषाया रंगीन बाःछिपौ पेजथ्रीया सम्पादक दर्शनवीर शाक्यं म्येया भिडियोलय् पुर्खां न्ह्याकावःगु पुलांगु परम्परानिसें आधुनिक समाजय् दुहांवःगु चलनत नं क्यनातःगु धासें स्वकुमिपिन्सं थुकियात स्वयेगु मिखा पानाच्वनीगु धयादिल ।

म्येय् मोहनिया झ्वलय् भुतिमालि ब्वयेकेगु चलन, महाअष्टमीकुन्हु कूछिभ्वय् नयेगु परम्परा, मोहनिया चालं आदिया लू क्यनातःगु दु ।

ज्याझ्वलय् म्येहालामि तुलाधरं थःगु ब्यान्ड ‘द इन्फ्लुएन्स’या ब्यान्ड मेम्बरतयत हना नं दीगु खः ।

थःत सुरुवाती दिनंनिसें हे संगीत ख्यलय् मदिक्क साथ बियावःगु धासें तुलाधरं ब्यान्ड मेम्बरत विनय स्थापित, निर्मल तुलाधर, कविन्द्र शाक्य व सुरेन्द्र श्रेष्ठयात हनादीगु खः ।

मोहनि नखः वल म्येय् तुलाधरलिसें प्रवेशमान शाक्य, पवित्र कसाः, विनय स्थापित, कविता जोशी श्रेष्ठ, रत्न शोभा महर्जन, प्रतिमा बज्राचार्य व शुभेच्छा तुलाधरं सः बियादीगु दु ।

लिसें हिमालय होटलया थुवाः दिनेश तुलाधर व स्याकार कम्पनीया सौरभ ज्योतियात थुगु म्यें न्हूगु म्हसीका ब्यूगु दु ।व्यापार, व्यवसाय ख्यलय् सकसिनं म्हस्यूपिं दिनेश तुलाधर व सौरभ ज्योतिं नं थुगु म्येय् थःगु सः बियादीगु दु ।

म्येया च्वमि अमृत रत्न शाक्य खः । बालकुमार मगर व अनिल मगरं छायाङ्कन यानादीगु भिडियोया सम्पादन ईन्द्र मानन्धरं यानादीगु दु । म्यूजिक भिडियोया निर्देशन सुरेन्द्र मानन्धरं यानादीगु दु ।

भिडियोलय् हिसिला महर्जन, शोभा महर्जन, सलोना बज्राचार्य, म्येच्वमि अमृतरत्नलिसें यक्व हे कलाकारतयसं अभिनय यानादीगु दु ।

थुगु म्येया भिडियो ओएसआर मुभिज युट्युब च्यानलमार्फत सार्वजनिक जूगु दु ।