बाखं च्वमि सरस्वती तुलाधर मन्त । छुं ई न्ह्यःनिसें म्हं मफयाच्वंम्ह तुलाधर ६८ दँया उमेरय् म्हिगः बहनी मदुगु खः ।

उसाँय् मदयाः अस्पतालय् वासः याकेगु झ्वलय् वयकः मदुगु खः ।

वयकःया च्वसाय् ‘पौभाः छगू जीवनया’, ‘लकसय् न्ह्यानाच्वंगु जीवन’, ‘ईया हिलासुइ थौंया जीवन’ लिसेंया बाखं मुना सफू पिदनेधुंकूगु दु ।

नेपालभाषा साहित्यया थपूया निरन्तर च्वसा न्ह्याकाच्वनादीम्ह वयकः नेपालभाषा विषयया स्यनामि नं खः ।

वयकःया अन्त्येष्टि थौं न्हिनसिया १२ताः इलय् लुति कर्णदीपय् जुइत्यंगु दु ।

मदुम्ह तुलाधर नेपालभाषा मिसा खलःया आजीवन दुजःलिसें थीथी संघसंस्थाय् आवद्ध जुयाः सामाजिक व साहित्यिक गतिविधिइ सक्रियम्ह खः ।

वयकः मदुगुलिइ नेपालभाषा मिसा खलः, नेवाः सूचना केन्द्र, नेपाल लिपि गुथि लगायत थीथी संस्थां बिचाः हायेकूगु दु ।