येँ । सुरेन्द्र महर्जनं मुंकादीगु ‘नेपाली भाषा – नेपालभाषा शब्दकोष’ सार्वजनिक जूगु दु । शुक्रबाः येँय् छगू ज्याझ्वःया दथुइ उगु शब्दकोष सफूया लोकार्पण याःगु खः ।

नेपाल प्रज्ञा प्रतिष्ठानया उपकुलपति अविनाश श्रेष्ठ, नेपाली–नेपालभाषा शब्दकोष प्रकाशन समितिया सल्लाहकार, अधिवक्ता युद्धमान महर्जन, प्रकाशन समितिया कजि तीर्थनारायण (राजु) महर्जन, संकलक सुरेन्द्र महर्जन, किरात स्वायत्त प्रदेश अभियानया नायः नगेन्द्र किरात, नेपालभाषा स्यनामि दबूया नायः रितेश मल्ल, ज्यापु महागुथि नेपाःया केन्द्रीय दुजः ई. सानुबाबु महर्जन, संगीतकारद्वय सन्तोष श्रेष्ठ व शिव शाहीलिसें नं मंकाः कथं शब्दकोषया लोकार्पण यानादिल ।

ज्याझ्वलय् प्रज्ञा प्रतिष्ठानया उपकूलपति श्रेष्ठं मनूया भाषाया विकासय् खँग्वःया महत्त्वपूर्ण थाय् दुगु बिचाः तयादिल ।

‘मेसोपोटामियाया सभ्यताय् चाय् खँग्वः कियाः उकियात मिइ छुनां सुरक्षित यायेगु परम्परा दुगु खः । थ्व हे परम्परायात खँग्वःधुकूया प्रारुप कथं कायेफइ’ श्रेष्ठं धयादिल ।

प्रकाशन समितिया दुजः शान्ता प्रजापतिं सफुतिइ नेपालभाषाय् अप्वः छ्यलीगु ‘न्ह’, ‘म्ह’, ‘न्ह्य’ व ‘ल्ह’ आखःयात चित्रात्मक रुपं न्ह्यब्वयातःगु जानकारी बियादिल ।

खँग्वः धुकूया मुंकामि महर्जनं थम्हं करीब १४दँया अथक कुतः लिपा गैर नेवाःतयसं कम तर नेवाः भाषाय् अप्वः छ्यलाबुलाय् दुगु आखःयात छगू रुप बीफुगु व थुगु आखःत टंकनया लागिं सुरेन्द्र नेवाः नांया फन्ट हे तयार यानागु जानकारी बियादिल ।

ज्याझ्वलय् शब्दकोष तयार यायेत थीथी कथं ग्वाहालि याःपिं व्यक्ति व संस्थायात सुभाय् पौलिसें हंगु खः ।

उगु हे ज्याझ्वलय् शब्दकोषया मुंकामि महर्जनयात विशेष सम्मान याःगु खः । ज्याझ्वलय् शब्दकोषया मुंकामि महर्जनं च्वयादीगु नासःद्यःया भजन नं न्ह्यब्वःगु खः ।