नेपालभाषा एकेडेमीं दँयदसं बियावःगु दान्यहिरा सिरपाः आः वइगु मंगलवार लःल्हाइगु जूगु दु ।

वइगु मंगलबाः किपूया न्यामासिमास्थित नेपालभाषा एकेदेमिइ हे छगू ज्याझ्वः यासें थुगुसीया दान्यहिरा सिरपाः लःल्हायेत्यंगु खः ।

नेपालभाषाया साहित्य व संगीत ख्यलय् बीगु सिरपाःमध्ये प्रतिष्ठित नालातःगु दान्यहिरा सिरपाः लिपांगु इलय् विज्ञान प्रविधि ख्यलय् नं बीगु यानावःगु दु ।

थुगुसीया दान्यहिरा सिरपाः बीगु झ्वलय् साहित्यपाखे समालोचक व साहित्यकार पुर्णकाजी ताम्राकार पुरस्कृत जुइगु जूगु दु ।

ताः ई न्ह्यःनिसें नेपालभाषाया साहित्य ख्यःया विकासया नितिं योगदान बियावःगु धासें ताम्राकारयात ५०द्वः तका व हनापौलिसें थुगुसीया दान्यहिरा साहित्य सिरपालं हनेत्यंगु खः ।

अथेहे थुगुसीया दान्यहिरा संगीत सिरपाः नांजाःम्ह म्येहालामि प्रवेश मान शाक्ययात बीगु जूगु दुसा दान्यहिरा विज्ञान प्रविधि सिरपाः एलन बैलोचन तुलाधरयात लःल्हाइगु जूगु दु ।

शाक्य व तुलाधर निम्हेसितं म्हतिं ५०द्वः/५०द्वः तका सिरपाः व हनापौलिसें पुरस्कृत याइगु एकेडेमीपाखें जानकारी ब्यूगु दु ।