नेपालभाषाया संगीत ख्यलय् नांजाःम्ह म्ये च्वमि अमृतरत्न शाक्य आः म्यूजिक भिडियो निर्देशकया रुपं पिलू वःगु दु । शाक्य निर्देशन यानादीगु म्यूजिक भिडियो ‘छकः छं न्हिला क्यँ’ सार्वजनिक जूगु दु ।

सोमबाः मध्यपुर थिमिइ जूगु ज्याझ्वलय् शाक्यं निर्देशन यानादीगु ‘छकः छं न्हिलाः क्यँ’ या म्यूजिक भिडियो वरिष्ठ म्येहालामि, संगीतकारलिसें गितारवादक मदन सिंह नेपालीं लोकार्पण यानादिल ।

ज्याझ्वलय् न्ववासें वरिष्ठ म्येहालामि, संगीतकार लिसें गितारवादक नेपालीं संगीत ख्यलं स्थानीय सवाः वइगु स्तरीय म्ये पिहांवःगु धासें म्येहालामिलिसें सकल टीमयात भिंतुना बियादिल ।

उगु हे ज्याझ्वलय् नेपालीं म्येहालामि ऋतु कँडेललिसे थःगु लोकंह्वाःगु म्ये ‘रेलिमाई रेलिमाई’ हालाः नं न्यंकादीगु खः ।

अथेहे, वरिष्ठ सिने पत्रकार विजयरत्न असंबरें छुं आर्थिक लबःया आशा मतःसे, छुं नीजि स्वार्थ विना मांभाय्, कला, संस्कृतिया संरक्षण जकया स्वार्थ ज्वनां न्ह्याःवनाच्वंपिं कलाकार, कलाकःमितयत साथ, ग्वाहालि बीत सकसित इनाप यानादिल ।

म्यूजिक भिडियो निर्देशकया नापं म्येया संगीतकार व च्वमि अमृत रत्न शाक्यं म्येया रचनानिसें म्यूजिक भिडियो निर्माणतकया यात्राबारे जानकारी बियादिल ।

ज्याझ्वलय् लोकार्पण जूगु म्ये कृष्णा श्रेष्ठलिसें चनेलाल मानन्धरं हालादीगु खः ।

थःगु नुगःखँ तयेगु झ्वलय् म्येहालामि मयजु कृष्णा श्रेष्ठं भाषा धइगु संचारया माध्यम जक मखसें छुं नं समुदायया इतिहास, सभ्यता व संस्कृतिया जीवन्त अभिव्यक्ति तकं खःगु बिचाः तयादिल ।

‘भाषा संचारया माध्यम व संगीत मनोरन्जनया साधन जक मखसें मनूया म्हसीकायात पुस्तौंतक जीवन्त दयेकातइगु माध्यम नं खः । थःगु भाषाया म्ये हालेगु, भावी पुस्तायात मौलिक म्हसीका पुस्तान्तरण नं खः’ म्येहालामि श्रेष्ठं धयादिल ।

मेम्ह म्येहालामि चनेलाल मानन्धरं म्ये व म्यूजिक भिडियो दयेकेत ग्वाहालि ब्यूपिं सकसित सुभाय् देछासें साथ व ग्वाहालिया लागिं इनाप यानादिल ।

ज्याझ्वलय् मध्यपुर सञ्चार समाजया नायः वरिष्ठ पत्रकार गोपाल श्रेष्ठ, थेम्मृङ मासिकया सम्पादक, नेवाः पत्रकार राष्ट्रिय दबूया केन्द्रीय दांभरिं वरिष्ठ पत्रकार बाबुकाजी साँछे श्रेष्ठलिसेंया उपस्थिती दुगु खः ।

लिसें झी म्ये हाले वा पुचःया नायः प्रमोद श्रेष्ठ, थेम्मृङ मासिकया प्रधान सम्पादक राजेन्द्र श्रेष्ठ व पलिस्था पुचः, थिमिया संस्थापक नायः सम्झना श्रेष्ठया नं उपस्थिति दुगु खः ।

म्येया संगीत संयोजनलिसें रेकर्डिङ अले म्यूजिक भिडियोया छायाङ्कन व दृश्य सम्पादन वरिष्ठ संगीतकःमि बुद्ध सायमिं यानादीगु दु । म्युजिक भिडियोस लिला जोशी, चनेलाल मानन्धर अले चण्डिका बाडे घजू, निमा प्रजापति व रोमी कर्माचार्यं अभिनय यानादीगु दु ।