रोशना तुलाधरं हालादीगु स्वपु म्येया म्युजिक भिडियो छक्वलं सार्वजनिक जूगु दु ।

आइतबाः येँय् जूगु छगू ज्याझ्वलय् तुलाधरं हालादीगु छपु नेपालभाषाया व निपु खस नेपाली यानां छक्वलं स्वपु म्ये पितब्वज्या जूगु खः ।

ज्याझ्वलय् जनकवि दुर्गालाल श्रेष्ठं च्वयादीगु ‘प्रभु जिं थुलि हे जक छंके फ्वने’या नापं ‘मन भित्र नौलो नौलो आश जागेछ’, व ‘ए कान्छा इशाराले के भन्न खोजेका’ बोलया म्येया म्यूजिक भिडियो प्रिमियर जूगु खः ।

ज्याझ्वलय् नेपालभाषा एकेडेमिया कुलपति मल्ल के. सुन्दर, म्ये च्वमि निल शाक्य, ध्रुवरत्न तुलाधर, दुर्गालाल श्रेष्ठया तःधिकःम्ह काय् सु मन श्रेष्ठ, संगीतकःमि मनराजा नकःमिलिसेंनं थःथःगु नुगः खँ तयादीगु खः ।

म्यूजिक भिडियोयात कयाः पेजथ्री वाःछिपौया सम्पादक दर्शन वीर शाक्य, वरिष्ठ सिनेम पत्रकार विजय रत्न असंबरें समीक्षा यानादीगु खः ।

सार्वजनिक जूगु स्वपु म्ये मध्ये जनकवि दुर्गालालं च्वयादीगु नेपालभाषाया म्ये जनकवि दुर्गालालं च्वयादीगु नेपालभाषाया म्ये ‘थुलि हे जक फ्वने’ यात मनराजा नकःमिं लसय् हनादीगु दु ।

म्यूजिक भिडियोस म्येहालामि रोशना, निर्माता विजयरत्न तुलाधरलिसें भिन्तुना जोशी, रोजिना सुवाल, शोभा महर्जन, सलोना बज्राचायं अभिनय यानादीगु दु ।

छायाङ्कन व दृश्य सम्पादन आकृष्ट शाक्यं यानादीगु दुसा निर्देशन विश्वास बज्राचार्ययागु खः ।

धुब्ररत्न तुलाधरया म्येग्वः ‘मन भित्र’यात अनिल शाहीं लसय् हनादीगु दु । म्यूजिक भिडियोस सलोना बज्राचार्य व सिजन शाक्यं अभिनय यानादीगु दु ।

भीम श्रेष्ठं छायाङ्कन म्यूजिक यानादीगु दुसा डिओपीलिसें दृश्य सम्पादन अमर चित्रकारं यानादीगु दु ।

‘ए कान्छा’ म्येया च्वमि व लयचिनामि नील शाक्य खः । लक्ष्मण श्रेष्ठ व निरन्जन महर्जनं छायाङ्कन यानादीगु लूयात लक्ष्मण श्रेष्ठं सम्पादन यानादीगु दु ।

राम श्रेष्ठया निर्देशनय् नरेन्द्र महर्जन व प्रिज्मा श्रेष्ठं अभिनय यानादीगु दु ।