साहित्यकार लिसें पुलांम्ह पत्रकार आर.के. निर्मलं भाय् हिलाः च्वयादीगु मचा उपन्यास ‘अजूचायापुगु जादुया भुखाचा’ सार्वजनिक जूगु दु । हरिओम पति राज राजोपाध्याय अथे धइम्ह साहित्यकार आर.के. निर्मलया न्हापांगु ज्याःजंक्वया लसताय् लहना मिडियाया लुखां उगु उपन्यास सफू पिदंगु खः ।

वंगु शनिबाः साहित्यकार निर्मलया जंक्व भ्वयया दथुइ हे छगू ज्याझ्वः यासें उपन्यासया लोकार्पण याःगु खः । अनौपचारिक रुपं न्ह्यानाच्वंगु भ्वयया दथुइ हे छगू बःचाहाकःगु ज्याझ्वः यासें सफूया विमोचन याःगु खः ।

नेवाः न्ह्यलुवाःलिसें अधिकारकर्मी नेता मल्ल के. सुन्दर, लहना मिडियाया नायः नृपेन्द्रलाल श्रेष्ठ, व्यवस्थापक सुरेन्द्रभक्त श्रेष्ठ, साहित्यकार आर.के. निर्मल व वय्कःया तिरिमयजु बिन्दीरा राजोपाध्यायलिसें व वयकःपिनि परिवारं सफूया लोकार्पण यानादिल ।

सफूया विमोचन धुंकाः न्ववासें नेवाः न्ह्यलुवाः मल्लं भाषा आन्दोलनलिसें पत्रकारिता क्षेत्रय् थः पुलांम्ह सहकर्मी आर. के. निर्मलया उपन्यास सार्वजनिक जूगुलिइ लसता प्वंकादिल ।

‘भाषा आन्दोलननिसें जिं इनाप वाःपौ पिथनाच्वनागु इलय् जितः मदिक्क सक्रिय रुपं साथ ब्यूम्ह पासा आर.के. निर्मलया ज्याःजंक्वकुन्हु कायपिं जानाः पिथंगु थ्व सफू हे वयकःयात दकले तःधंगु सगं खः । थ्वयां लिपा निर्मलया च्वसा आः गबलें मदीमा, न्ह्यानाः तुं च्वनेमा, जिगु भिन्तुना’ मल्लं धयादिल ।

साहित्यकार निर्मलया चिधिकःम्ह काय् बिराजकाजी राजोपाध्यायं सफू पिथनेगु धइगु जानकारी तकं मब्युसे थः अबुयात सरप्राइज गिफ्ट बी कथं लहना मिडिया व्यवस्थापक सुरेन्द्र भक्तलिसे जानाः सफू पिथनागु धयादिल ।

चाङ थ्येन ईं च्वयादीगु चाइनिज उपन्यासयात श्यामा बल्लभं अनुवाद यानाः ‘जादुकी तुम्बी’ नामं हिन्दी भाषां पिथंगु खःसा व हे हिन्दी भायया उपन्यासयात साहित्यकार निर्मलं नेवाः भाषां हीकाः विश्वभुमि न्हिपौया शुक्रबाःया तँसापतिइ धारावाहिक रुपं पिथनादीगु खः । व हे बाखंयात ‘अजूचायापुगु जादुया भुखाचा’ नामं सफूया रुपय् आः पिथंगु खः ।

थःगु नुगःखँ तयेगु झ्वलय् साहित्यकार निर्मलं विश्वभुमि पत्रिका हे दिनावंबलय् शुक्रबाःया तँसापतिइ पूवनेमफूगु उपन्यासयात आः सफूया रुपं पूर्णता बीखंबलय् थः लय्तायागु धयादिल ।

‘न्हापा हे पिदनीगु धाःगु सफू उबलय् पिमदन । आः जिगु जंक्वया लसताय् धकाः जिं हे मसीक थ्व सफू थुकथं पिदंबलय् जि धात्थें हे अजू चाल, जिगु लागिं थ्व धात्थें हे सरप्राइज गिफ्ट हे जुल’ साहित्यकार निर्मलं धयादिल ।

लहना मिडियाया व्यवस्थापक सुरेन्द्र भक्तं प्यदँ न्यादँ न्ह्यःनिसें पिथने धाधां लिबानाच्वंगु सफू, च्वमिया हे ज्याःजंक्वकुन्हु पिथनेखंगुलिइ थःपिन्त गौरवया अनुभूमित जूगु धयादिल । लहना मिडियाया नायः नृपेन्द्रलालं पुलांम्ह पत्रकारलिसें साहित्यकार आर.के. निर्मलया जंक्वकुन्हु थःपिन्सं नं छुं यायेखंगुलिइ थःपिन्त भाग्यमानी हे तायेकागु धयादिल ।

सफूया प्रकाशक लहना मिडिया खः । सफूया द्यबः डिजाइन सचिना राजोपाध्यायं याःगु खःसा लेआउट डिजाइन रोशन राजोपाध्यायं यानादीगु दु । सफूया मू न्यासः तका तयातःगु दु । सफू बुकिङ याःपिन्त होम डेलिभरीया सुविधा दुगु लहना मिडियां जानकारी ब्यूगु दु ।