नांजाःम्ह कलाकार आराध्या लक्ष्मी खड्गीया सछिपु म्यूजिक भिडियोलिसें कला ख्यलय् छगू दशक पूवंगु लसतायात उत्सवया रुपं हंगु दु ।

कलाकार खड्गीया बुदिंया ई लाकाः यलय् छगू तःजिगु ज्याझ्वः यासें उत्सव हंगु खः ।

ज्याझ्वलय् खड्गीं थः मांअबुलिसे केक तानां थःगु बुदिं हन । अथेहे, वरिष्ठ कलाकार मदनकृष्ण श्रेष्ठ, आमा संकिपाया आमा चैत्यदेवी सिंहलिसेंया कलाकारतलिसे केक तानां सछिपु म्यूजिक भिडियो व कला ख्यलय् एक दशकया लसता हन ।

ज्याझ्वलय् वरिष्ठ कलाकारपिं मदनकृष्ण श्रेष्ठ, चैत्यदेवी सिंह, हिसिला महर्जनलिसें संगीतकःमि जुगल डंगोल, यमन श्रेष्ठ, राजेशमान सिंहलिसेंनं खड्गीयात भिंतुना ब्युसें थःगु खँ तःगु खः ।

उसाँय् अवस्था बांमलाःगु हुनिं ज्याझ्वलय् थ्यंकेमफुम्ह वरिष्ठ सिने पत्रकार विजयरत्न असंबरेया भिंतुना हसना भिडियो सामग्रीमार्फत तःगु खः ।

कलाकार खड्गीं कला ख्यलय् न्ह्याःवनेत हःपाः ब्यूपिं सकसित सुभाय् देछासें भविष्यय् अझ बांलाक ज्या यानावनेगु प्रतिवद्धता प्वंकादिल ।

ज्याझ्वलय् खड्गीया छगू दशकया कला यात्रा सम्वन्धि जानकारीमूलक भिडियो सामग्री नं क्यंगु खः ।