म्येहालामि रन्जु श्रेष्ठया वरिष्ठ म्येहालामि कलाकार मदनकृष्ण श्रेष्ठलिसेया ज्वःम्ये ‘मतिनाया खँ छन्त धाये जितः मन दु’ पिदंगु दु ।

थुगु म्ये अडियो नेपाल युट्युब च्यानलमार्फत विहिबाः बहनी सार्वजनिक जूगु खः ।

मदनकृष्ण श्रेष्ठ थुज्वःम्ह वरिष्ठ कलाकारलिसे थम्हं म्ये हालेखनां थः धन्य ताःगु म्येहालामि रन्जुं धयादिल ।

म्येया भिडियोलय् म्येहालामिपिं रन्जु व मदनकृष्ण म्ये हालाच्वंगु हे क्यनातःगु दु ।

अमृतरत्न शाक्यया च्वसायात संगीतकार बुद्ध सायमिं लसय् हनादीगु दु । म्येया छायाङ्कन व दृश्य सम्पादन बुद्ध सायमिं हे यानादीगु दु ।

थुगु म्ये हालादीम्ह मयजु रन्जुया थ्वयां न्ह्यः नेपालभाषाया म्ये ‘अय् मयजु छ जिगु न्ह्यःने’, ‘वल रे वल जितः यःम्ह यज्जु वल’, ‘द्यंसा छ दंसा छ’ लिसें नेपाली म्ये ‘हावासँग’, गणेश भजन, कृष्ण भजन नं पिदनेधुंकूगु दु ।

लिसें वयकलं स्वक्वःगु स्टार नेपालभाषा म्यूजिक भिडियो अवार्डय् दकले बांलाःम्ह मिसा म्येहालामिया अवार्ड नं त्याकादीगु खः ।