संयुक्त श्रेष्ठं दयेकादीगु नेपालभाषाया एनिमेशन फिल्म ‘जय लाखय्’  ग्रीसय् पुरस्कृत जूगु दु ।

ग्रीसय् जूगु एथेन्स इन्टरनेशनल मन्थ्ली आर्ट फिल्म फेस्टिभलय् ‘जय लाखय्’ संकिपां बेस्ट एनिमेशन फिल्म अवार्ड त्याकूगु खः ।

थुगु अवार्ड त्यायेधुंकाः थ्व हे फिल्मया माध्यमं  नेपाःया तजिलजियात विश्वय् थ्यंकेत तःधंगु ग्वाहालि जुइगु आशा थहांवःगु निर्देशक श्रेष्ठं धयादिल ।

उगु फिल्म फेस्टिभलय् ‘टाइम इन इटरनिटी’यात बेस्ट फिचर फिल्म, ‘स्ट्रेन्ज अर्बिट’यात बेस्ट कस्ट्युम डिजाइन, ‘डार्लिंग’यात बेस्ट ओरिजिनल स्कोर, ‘द हार्ड वे होम’ व ‘नक्ट्रिनस’फिल्म यात नं थीथी अवार्ड ब्यूगु निर्देशक श्रेष्ठं जानकारी बियादिल ।

निर्देशक श्रेष्ठं थ्वयां न्ह्यः नेपाल संवतया प्रवर्तक शंखधर साख्वाःया बाखंयात कयाः एनिमेटेड संकिपा ‘द लेजेन्ड अफ शंखधर’ दयेकादीगु खः ।

श्रेष्ठया ‘जय लाखय्’ येँयाःया इलय् पिहांवइम्ह लाखयया किम्बदन्तिया लिधंसाय् दयेकूगु संकिपा खः ।