आदिवासी जनजाति संकिपा नखतय् नेपालभाषाया संकिपा ‘स्वयनगु’ पाखें दकले बांलाःम्ह नकिंया सिरपाः त्याकूगु दु ।

आदिवासी जनजाति चलचित्र महासंघं स्वन्हुयंक ग्वसाः ग्वःगु सकिपा नखतय् निकं भिंतुना जोशीं थुगु संकिपापाखें उत्कृष्ट अभिनेत्रीया अवार्ड त्याकूगु खः ।

नखतय् गुरुङ संकिपा ‘ङोल्स्यो रामरानी’ उत्कृष्ट संकिपा घोषित जुल सा थुगु हे संकिपां उत्कृष्ट पटकथा (स्क्रिप्ट) या अवार्ड नं त्याकूगु खः । मगर वृत्तचित्र ‘आग्रे’ उत्कृष्ट वृत्तचित्र जुइत ताःलाःगु दु ।

उत्कृष्ट चिप्याखंया सिरपाः नं गुरुङ समुदाययात हे वन । गुरुङ चिप्याखं ‘लाहुरेनी’ संकिपा नखःया उत्कृष्ट चिप्याखं जुल । इन्करेजमेन्ट अवार्ड तामाङ चिप्याखं ‘दुखला ग्यम’यात वन ।

जुरी अवार्ड राजवंशी वृत्तचित्र ‘बिराटनगरके प्राचिन राजवंशी’यात ब्यूबलय् लिम्बू समुदायया ‘रीत’ संकिपां पब्लिक चोइस अवार्ड त्याकल ।

तामाङ संकिपा ‘ह्याङ तामाङ’या छायाङ्कार सूर्य लामां उत्कृष्ट छायाँकारया अवार्ड ल्हातय् लाकल । मगर संकिपा ‘दिलसरा’ या नायः कल्याण राना मगरं उत्कृष्ट अभिनेता (नायक) या सिरपाः त्याकल ।

उत्कृष्ट निर्देशकया सिरपाः लिम्बू चलचित्र ‘रीत’ या निर्देशक दिनेश लिङ्देनया ल्हातय् लात ।

वंगु जेष्ठ १७ गते आइतबारनिसें चाबहीस्थित चलचित्र विकास बोर्डया सभाहलय् न्ह्याःगु संकिपा नखतय् फिचर संकिपा, चिप्याखं व बृत्तचित्र यानां १३ संकिपा क्यंगु खः ।

नखतय् संकिपा क्यनेज्यालिसें अन्तरक्रियालिसें थीथी जातीय समुदायया झाँकी नं न्ह्यब्वःगु खः । नखः ज्वःछि थीथी जातीय समुदायया मौलिक नसा ज्वलंया स्टलत नं तःगु खः ।

महासंघय् आदिवासी संकिपा सम्वद्ध थीथी १४ जातीय संस्थाया प्रतिनिधित्व दु । महासंघय् नेवाः समुदायया प्रतिनिधित्त्व नेवाः फिल्म सोसाइटीं यानाच्वंगु दु ।

समारोहस आदिवासी जनजाति उत्थान राष्ट्रिय प्रतिष्ठानया निमित्त प्रमुख राम मादेनं थज्याःगु ज्याझ्वलं आदिवासी संकिपा ख्यःयात मूलधारय् वयेत तिबः बीगु बिचाः तयादिल ।

नखः निर्देशक सागर केरुङं थ्व नखतय् लिपा लिपा अझ यक्व आदिवासी जनजाति संकिपात कःघायेगु प्रतिबद्धता प्वंकादिल । महासंघया नायः भुइँसल लामां नखःया आज्जुबारे जः ह्वलादिल ।

नेपाल चलचित्र निर्देशक समाजया नायः अरुण कुमार प्रधान, आदिवासी जनजाति महासंघया न्वकू अमृत सुनुवार, चलचित्र पत्रकार संघ नेपालया नायः समिर बलामीं नेपालय् आदिवासी जनजाति समुदायया संकिपाया अवस्थाबारे थःगु धापू तःगु खः ।

संकिपा निर्देशक, पत्रकार लिसें नेपाल अफ्रिका अन्तर्राष्ट्रिय संकिपा नखःया निर्देशक डब्बु क्षत्रीं नेपालय् राष्ट्रिय व अन्तर्राष्ट्रिय संकिपा नखःया अवस्थाबारे खँ तयादिल ।