आदिवासी जनजाति चलचित्र महासंघया ग्वसालय् वइगु जेठ १७ गतेनिसें येँय् संकिपा महोत्सव याइगु जूगु दु ।

महासंघं पत्रकार सम्मेलन यानां वइगु जेठ १७ गतेनिसें १९ गतेतक खुक्वःगु नेपाल आदिवासी जनजाति संकिपा महोत्सव २०८३ येँ चाबहीस्थित चलचित्र विकास बोर्डय् महोत्सव यायेत्यनागु जानकारी ब्यूगु खः ।

पत्रकार सम्मेलनय् न्ववासें महासंघया प्रमुख सल्लाहकार अमृत बहादुर सुनुवारं महोत्सवं नेपालयात विश्व आदिवासी संकिपा आन्दोलनया छगू सशक्त उदीयमान केन्द्रया रूपं स्थापित याइगु दावी यानादिल ।

‘थ्व छगू संकिपा क्यनेगु स्वयेगु दबू जक मखु, थ्व हे दबुलिं संकिपाया माध्यमं आदिवासी जनजातिया मुद्दायात अन्तर्राष्ट्रिय स्तरय् वहस यायेगु लकस दयेकी । अन्तर्राष्ट्रिय संकिपाकःमि, अनुसन्धानकर्ता, अभियन्ता अले समुदाय दथुइ संवाद, सहकार्य व वैकल्पिक सिनेम्याटिक विमर्शया लकस दयेकीगु विश्वास महासंघया दु’ निवर्तमान नायः सुनुवारया धापू खः ।

महोत्सवय् लिम्बू, नेवाः, गुरुङ, थारु, तामाङ, मगर, भुजेल, माझी अले राजवंशी समुदायया फिक्सन संकिपा, चिप्याखं, वृत्तचित्र व एआइ जेनेरेटेड वृत्तचित्र नं क्यनेगु जानकारी ग्वसाः खलकं ब्यूगु दु ।

महोत्सवय् फिक्सनपाखे नेवाः संकिपा स्वयनगु क्यनीगु जूगु दु ।

अमृतमान महर्जनं निर्देशन यानादीगु थुगु संकिपाय् भिन्तुना जोशी, सुरज व्यन्जनकार, सुशीला तण्डुकार, रणेन्द्र महर्जन, नारायणदेवी प्रधान, नगीना जोशी, अन्नपूर्णेश्वरी श्रेष्ठलिसें निर्देशक महर्जन थम्हं हे नं अभिनय यानादीगु दु ।

महोत्सवय् फिक्सनपाखे स्वयनगुया नापं दिनेश लिङदेन निर्देशित “रीत”, जनक गुरुङ निर्देशित “ङोल्स्यो रामरानी”, निमा लामा तामाङ निर्देशित “ह्याङ तामाङ”, अले अशोक आले मगर निर्देशित “दिलसरा” नं क्यनेत्यंगु दु ।

चिप्याखंपाखे सागर केरुङ निर्देशित “तङसिङ”, हुतबहादुर तामाङ निर्देशित “दुखला ग्यम”, परशुराम चौधरी निर्देशित ’जाइछै सौसरा’ बिपना तामाङ भुजेल निर्देशित “निको पहिचान” अले विशाल रोक्का मगर निर्देशित “लाहुरेनी” महोत्सवय् दुथ्यानाच्वंगु दु ।

वृत्तचित्रतर्फ अनिल मगर निर्देशित “आग्रे”, होम कुमारी माझी निर्देशित “लदि पुजा” अले अरविन्द विश्वास निर्देशित एआइ जेनेरेटेड वृत्तचित्र “बिराटनगरके प्राचिन राजवंशी” क्यनेज्या जुइ ।

महोत्सवय् उत्कृष्ट चिप्याखं, उत्कृष्ट वृत्तचित्र व फिक्सन संकिपापाखे उत्कृष्ट संकिपा, उत्कृष्ट निर्देशक, उत्कृष्ट स्क्रिप्ट, उत्कृष्ट अभिनेता, उत्कृष्ट अभिनेत्री, उत्कृष्ट छायांकन, हःपाः सिरपाः व जुरी अवार्ड बीगु ग्वसाः खलकं धाःगु दु ।

नेपालया न्हापांगु आदिवासी मातृभाषी संकिपा नेपालभाषाया ‘सिलु’ २०४४ सालय् रिलिज जूगु खः । व इलंनिसें आदिवासी संकिपाया प्यंगू दशकया यात्राय् आःतक करिब १५सः स्वयां अप्वः आदिवासी मातृभाषी संकिपा दयेकेधुंकूगु दु ।