गायक जुजुभाई तुलाधरया न्हूगु म्ये ‘पियाच्वना’ सार्वजनिक जूगु दु ।

गायक तुलाधरया थुगु म्येया म्यूजिक भिडियो आइतबाः येँय् छगू ज्याझ्वः यासें सार्वजनिक याःगु खः ।

ज्याझ्वलय् न्ववासें नेपालभाषाया न्हापांम्ह म्युजिक भिडियो निर्देशक विजयरत्न असंबरें उमेरं थकालि जूसां वैशं जाःम्ह गायक जुजुभाई तुलाधर थ्व उमेरय् नं थःगु जीवन संगीत ख्यःया नितिं फ्यायेज्यू धइगु खँया दसु खः धयादिल ।

अथेहे पेजथ्री बाःछिपौया सम्पादक दर्शनबीर शाक्यं जुजुभाई तुलाधरया संगीत साधना सकसिनं लीफयेमाःगु धयादिल ।

गायक तुलाधरं हे च्वयादीगु थ्व म्येया संगीतकार गोविन्द ह्युमत ख ।

म्यूजिक भिडियोलय् शोभा महर्जनलिसें जयलक्ष्मी सिद्धि बज्राचार्य, सिताराम माकः, सुधा शाक्ययानापं गायक तुलाधर थम्हं हे नं अभिनय यानादीगु दु ।

सुरेन्द्र तुलाधरं निर्देशन यानादीगु भिडियोया छायाङ्कन व दृश्य सम्पादन सोहन मानन्धरं यानादीगु दु ।

गायक तुलाधरया थ्वयां न्ह्यः पिदंगु म्ये लक्का पठ्ठा नं लोकंह्वाःगु म्ये खः ।