येँ/संस्कृतिविद् लिसें चर्या गुरु यज्ञमानपति बज्राचार्य याकः सनिल ज्याझ्वः “चर्या प्रवाह” क्वचाल ।

चर्या बौद्ध दर्शन अले हुलाप्याखं ख्यलय् च्वछायेबहःगु योगदान बियावःम्ह चर्या गुरु बज्राचार्ययात विशेष सम्मान यासें चर्या प्रवाह ज्याझ्वः जूगु खः ।

ज्याझ्वलय् न्ववासें गुरु बज्राचार्यं थःत मनू जुयाः जन्म जुयागुया अर्थ थ्व हे ज्याझ्वलं दुग्यंक अनुभूत यानागु धयादिल ।

‘थज्याःगु आध्यात्मिक अले सांस्कृतिक ज्याझ्वः तसकं दुर्लभ जक जुइ । थौं जिं थःगु जीवन सार्थक जूगु महसुस यानागु दु ।’ बज्राचार्यं धयादिल ।

येँ महानगरपालिकाया कार्यवाहक प्रमुख सुनिता डंगोलं गुरु बज्राचार्यं छुं नं जात, उमेर, वर्ग वा समुदायया भेदभाव मयाःसे सकसितं समान कथं शिक्षा बियावःगु बिचाः तयादिल ।

‘चर्या प्रवाह’ ज्याझ्वलं नेपालया अमूल्य अमूर्त सांस्कृतिक सम्पदाया संरक्षण व प्रवर्ध्दनय् मूवंगु योगदान ब्यूगु ग्वसाः खलःया धापू दु ।

ज्याझ्वः येँ महानगरपालिका, यूनेस्को अले काठमाडौं सिटी अफ फिल्म्सया मंकाः ग्वसालय् व नेपाः डान्स एकेडेमी, बौद्ध दर्शन अध्ययन पुचः व नेपा सांस्कृतिक पुचःया सहकार्यय् जूगु खः ।