नेपालगंजय् ‘म्यूजिक फर हार्मोनी’ (सद्भावया लागिं संगीत) ज्याझ्वः जुइगु जूगु दु । अन्तरालया ग्वसालय् थ्व हे फागुन २६ गते शनिबाः नेपाल कल्चर फेस्टिवलया लसता लाकाः ज्याझ्वः जुइत्यंगु खः ।

म्यूजिक फर हार्मोनीया लागिं अन्तराष्ट्रिय रुपं हे नां जायेधुंकूगु ब्याण्ड ‘कुटुम्व’, म्येहालामि झुमा लिम्बु व रैथाने व्याण्डं न्हापांगु खुसी सहकार्य यायेत्यंगु दु ।

नेपाली लोक बाजं व धुनयात न्हू पुस्ता दथुइ थ्यंकेत कुटुम्बया तःधंगु भूमिका दु । नेपाली रैथाने संगीतय् हे अध्ययन यानाच्वनादीम्ह झुमां विदेशी भूमिइ तःक्वः हे म्ये हालादीधुंकल ।

‘देयन्यंकया तजिलजि छथाय् हे पिब्वइ कथं ग्वसाः ग्वयागु नेपाल कल्चर फेस्टिभलया तयारी तच्वयेकागु दु । म्यूजिक फर हार्मोनीं नेपालगंजं हलिंयात सद्भावया हसना बी’ अन्तरालया ज्याझ्वः कजि गणेश राईं धयादिल ।

नेपालगंज रंगशालाय् जुइगु ज्याझ्वःया टिकट मीगु छुं दिनं हे न्ह्याइगु व विद्यार्थीयात विशेष सहुलियत दइगु धाःगु दु ।