ने.सं. ११४४ पोहेंलागा अष्टमी (२०८० माघ २०) शनिबाःया दिनस नेवाः देय् दबू, नेपालभाषा मंकाः खलः, नेपालभाषा एकेडेमि व नेपाल संवत न्हूदँ राष्ट्रिय समारोह समितिया मंकाः ग्वसालय् ‘झी जनगायक भृगुराम श्रेष्ठ व सदावहार गायक योगेश वैद्य’या लुमन्तिइ येँय् जूगु ‘मंकाः बिचाः मुँज्या’य् साहित्यकार आर.के. निर्मलं न्ह्यब्वयादीगु भृगुराम श्रेष्ठया लुमन्तिः

छम्ह मनू, सुयात म्हसीका च्वने हे माःगु मखु । वयकः थ्व खः, व खः धकाः धयाच्वनेगु सुर्द्यःया म्हसीका बियाच्वने थें हे जुइ । नां मात्र कायेवं हे प्रभावशाली व्यक्तित्वया धनी वयकः झीगु मिखाया न्ह्यःने झ्वाताहां दं वये हे धुंकी, जनगायक भृगुराम श्रेष्ठ ।

आः थन नां जक कायेवं हे पक्का नं सकसिगु मिखाय् वय्कःया न्ह्यूख्वाः दं वयेधुंकल । न्ह्याबलें न्ह्यूख्वाः वःम्ह वय्कःया दुने गुलि दुःख सुलाच्वंगु दु धइगु सखे म्ह्वः हे मनूतयसं जक स्यू ।

छायधाःसा वयकलं थःगु दुःख अझ धाये, थःगु नुगःया घाः स्वइतं गबलें नं क्यनादी मखु ।

थः खुदँ जक दुबलय् बौ आशारामया ल्हाः ज्वनाः त्यःर त्वाःया भजनय् वनाः भजन हाः वनेगु धकाः बरोबर जिमित कनेगु यानादी । वयकः भजन, म्ये हालेगुलिइ जक लिकुनामदी, उलि हे बांलाक अभिनय नं यायेसः, प्याखं नं हुलादी ।

हुलाप्याखं वयकलं कान्छाबुद्ध बज्राचार्ययाके स्यना काःगु जुयाच्वन ।

वयकःया पुलांगु खँत लुमंकाः वनेबलय् जि चीधिकःबलयया यक्वं खँत लुमना वइ ।

सखे, थ्व २००९ सालया खँ जुइमाः, उगु इलय् जि न्यादँ खुदँ ति जक हे तिनि । येँया पुन्हिया लसता लाकाः त्वाः त्वालय् दबू दयेकाः प्याखं क्यनेगु चलन दु । व हे झ्वलय् दुर्गालाल दाइ नं ग्राम्य जीवन धैगु नामं पूधाः प्याखं च्वयाः थम्हं हे निर्देशन यानादीगु खः ।

उगु प्याखनय् भृगु दाई हिरो, काइदाइ हिरोनी । अले छम्ह क्रुरम्ह जमिन्दार जुयाः दुर्गालाल दाई थम्हं हे म्हितादीगु खः । उगु प्याखं जिथाय् छेँय् छेलिइ न्हिं न्हिं रिहर्सल याइगु । जि नं न्ह्यः पाः यानाः रिहर्सल स्वयाच्वनेगु ।

यःसिं धस्वाकल, येँयाः सुरु जुल, प्याखं पिदन । स्वये हे हिरो थें जिवं लाःम्ह ख्वाः नं बांलाःम्ह भृगु दाइ हिरो । मिसा स्वःसा स्वये हे म्वाःम्ह काइ दाइ हिरोनी । धात्थें हे क्रुरम्ह हारांम्ह जमिन्दार खनेदु दुर्गालाल दाइ । अले मोहनी झुमि यंकूथें यंकेफुगु सः दुम्ह भृगु दाइया सलय् म्ये न्यनेत उगु प्याखं क्यनीथाय् मनूत म्वः म्वः जुइगु ।

उकथं व प्याखं सकसिनं ययेकूगुलिं गुबलें गुबलें चच्छिया दुने हे निथाय् तकं क्यने मालावन । सकसियां यःगु प्याखं यःसिं क्वथयेधुंकूबलय् क्यने मन्त । खर्च जूगु धेबा साःला मसाःला व जिं मसिल ।

स्व दुर्गालाल ! थ्व प्याखनय् खर्च जूगु धेबा साःगु मखुनि । जिगु गुलिमछि दां खर्च जुयाच्वंगु दनि । उकिं व धेबा सायेकेत कुमारी माजुपाखें मजिष्ट्रेटयात धायेकाः च्यान्हुतक क्यनेब्यूसा क्यनेगु, ज्यू धाः हुँ

यःसिं क्वथयाः कन्हयकुन्हु कुमारी माजुं व हे प्याखं स्वयेमाल धाल हं धकाः भृगु दाइ, दुर्गालाल दाइपिं झायाः जिमि मांयाके छु यायेगु धकाः न्यं झाल । जिमि मांयात न्यंवःगुया कारण– दांया ल्याःचाः तयेगु जिम्मा जिमि मांयात बियातःगु खः ।

‘स्व दुर्गालाल ! थ्व प्याखनय् खर्च जूगु धेबा साःगु मखुनि । जिगु गुलिमछि दां खर्च जुयाच्वंगु दनि । उकिं व धेबा सायेकेत कुमारी माजुपाखें मजिष्ट्रेटयात धायेकाः च्यान्हुतक क्यनेब्यूसा क्यनेगु, ज्यू धाः हुँ ।’ जिमि मामं भृगु दाइपिन्त थथे धकाः धयाः छ्वत ।

कुमारी माजुया उजं कथं हानं मेगु च्यान्हु नं क्यन । थुकथं जिं लुमंकथं थ्व प्याखं च्यान्हु जक मखु, मेगु नं ग्वःन्हु मछि क्यंगु दु । प्याखं रिहर्सल जुइगु, छुं यायेगु सहलह ब्याकीगु जिमिगु हे क्वथाय् जुइगु । गुबलें गुबलें जिमि मां नं जा थुयाः नं सकसितं नकीगु ।

थथेअथे जुजुं भृगु दाइ जिमि परिवारया दुजः हे जुयावन । भृगु दाइ नं जिमि मांयात थः मामं हे मयाःगु मतिना याःम्ह छ जिमि मां हे जुल धयादी । जिमि मामं नं भृगु दाइयात थः ज्येथाम्ह काय् थें व्यवहार यानातल ।

थुकथं जिमि दुःखसुख सकतां ब्याःम्ह भुगु दाइ थौं सकसितं त्याग यानाः झाल ।

वयकः म्वानाच्वँतल्ले नं दुःखं मप्वं । ल्यायम्हम्ह काय् नवीन मत्यवं मन्त । तःदँ लिपा याकः म्ह्याय् नवीना नं अकालं मन्त । नवीना मदुबलय् वयकःपिं निम्हतिपूया तसकं नुगः मछिं । मानो थ्व संसारय् थःगु धैगु हे छुं हे मदु थें तायेकादिल धाःसा पाइमखु ।

थः म्ह्यायया ख्वाः स्वयाच्वने मदुसां नवीनाया काय् थः छयया ख्वाः जक स्वयाः सां मन तयाच्वने धकाः जिलाजं सम्धिपिन्त बिन्ति यानादिल । तर इमिसं बी मधाः ।

थुकथं मन ख्वयेकाच्वंम्ह वयकःयात हानं मेगु मार वल । वयकःया तिरिमयजु जुलुमेश्वरीया उसाँय् मन्त । ल्वय् नं भचा ग्यानापुगु हे जुल । छन्हु चान्हय् न्ह्यलं चाःबलय् थः जहान मन्त धकाः हे च्वनागु धकाः छक्वः नुगः मछिंकाः जितः कनादीगु दु ।

थुकथं नवीना मुदगुया दुःख हे तने मलावं कलाः बिरामी जुयाः छु याये गथे याये यायां वासः यानाच्वंगु । हाकनं जहान जुलुमेश्वरीं नं भृगु दाइयात वानाः परलोक जुयादिल । तर थः मस्तयत मन तयेगु निम्तिं वयकलं अपायसकं ख्वयाः क्यनामदी ।

अथे धैर्य यानाः मन ची फुगु नं धन्य हे खः ।

वयकःया न्हापांगु ज्याःजंक्वया दिन न्ह्यःने थ्यन । तर वयकलं थः काय् जबिनयात छिमि माम्हं त्वःता वनेधुंकाः छुकिया जंक्व धकाः जंक्व यायेत मानय् हे जुयामदिल

छन्हु धाधां निन्हु धाधां दंदँ बिनावन । वयकःया न्हापांगु ज्याःजंक्वया दिन न्ह्यःने थ्यन । तर वयकलं थः काय् जबिनयात छिमि माम्हं त्वःता वनेधुंकाः छुकिया जंक्व धकाः जंक्व यायेत मानय् हे जुयामदिल ।

वयकःया माहिलाम्ह काय् जबिन व वया जहान जिथाय् वल । इमिगु खँ न्यनेधुंकाः जिपिं निम्हत्यपू नं वनाः अनेक कथं खँ ल्हानाः जंक्व याये धायेका । मस्तयसं बांलाक तःजिक हे भिंद्यःत्वाःया देय् भ्वय् छेँय् जंक्व यानाबिल ।

निक्वःया जंक्व ७२ सालया भुखाचं यानाः यायेमखन । स्वक्वःया जंक्व नं वयकलं यायेत मानय् हे जुयामदिल ।

भुखाय् ब्वल, कोरोना वल, डेंगु वल, अझ मेमेगु छु छु जुल खइ । वयकः न्ह्याबलें थःगु व हे छेँया छेलि क्वथाय् च्वनादी । थःत मामं बुइकातःगु छेँ धकाः वयकलं गुबलें नं उगु हे छेँ त्वःताः मझाः । न्ह्याबलें व छेँया व हे छेलि क्वथाय् ।

व हे छेलि क्वथाय् याकःचा च्वनाः मेपिन्त मक्यंसे नुगलय् दुने सुचुकातःगु दुःख ख्वबि जुयाः मिखां हायेकल । सुनां खँ हे खन धाःसा मिखाय् धू दुहांवन का, मिखा भचा हीसे च्वंगु का धयादी । ख्वबि सुइतं क्यनेमयः, सकसितं न्ह्याबलें न्हीका च्वने जक यः ।

थथे हे जुजुं गुइछदँ पुलाः गुइनिदँ दयाच्वंबलय् वय्कलं थ्व संसार त्वःताः झाल ।

थौं भृगु दाइया शरीर झीलिसे मदु, तर थौं वइला कन्हय् वइला, द्यःयात सिन्हाय् स्वां, असं त्वाःया दबू कुनय् मियातःगु ग्वाः, गां हे न्ह्यलं मचाय्क, यः जितः नं देश यः, रागमी नुगलय् लिसें आपालं आपाः म्येलिसे भृगु दाइ न्ह्याबलें झी दथुइ च्वना हे च्वनी ।