बरिष्ठ सिने पत्रकार असंबरेया ग्वाहालिया नितिं इन्दिरा धिमेय् मैंचाया च्यारिटी शो जुइगु जूगु दु ।

मृगौला सम्वन्धि समस्या जुयाः वासः याकाच्वनादीम्ह वरिष्ठ सिने पत्रकार असंबरेयात आर्थिक ग्वाहालि बीगु नेपालभाषा संकिपा दबुलिं थुगु च्यारिटी शो यायेत्यंगु खः ।

‘संकिपाकःमियात समस्या जुइबलय् ग्वाहालि यायेत संकिपाकःमि हे न्ह्यचिलेमाः । थ्व हे मान्यतायात कःघानां न्हापा नं थीथी संकिपाकःमियात ग्वाहालि यानागु दु । आः विजयरत्न असंबरेजुया ग्वाहालिया नितिं थ्व शो तयागु खः’ निर्देशक सुरेन्द्र तुलाधरं धयादिल ।

उगु च्यारिटी शो वइगु जेठ २८ गते सुथसिया  ८:३० ताः इलय् बिहिबाःकुन्हु किपू पाङ्गाया कीर्तिपुर सिनेप्लेक्सय् यायेत्यंगु दु । टिकटया मू ५सः तका तयातःगु दु ।

सकसिनं शोया टिकट न्यानां संकिपा स्वयादीत व वरिष्ठ सिने पत्रकार असंबरेयात ग्वाहालि यायेगु ज्याय् तिबः बियादीत निर्देशक तुलाधरं इनाप यानादीगु दु ।