गोपाल महर्जनं हालादीगु लोकंह्वाःगु म्ये ‘अयलाः अयलाः’ या भ्यूज १ करोड स्वयां अप्वः थ्यंगु दु ।

समाजसेवी महर्जनं हालाः पिथनादीगु म्ये ‘अयलाः अयलाः’ या म्यूजिक भिडियोया युट्युबय् भ्यूज १ करोड पूगु खः ।

म्यूजिक भिडियो पिदंगु प्यलां उगु म्येया भ्यूज १ करोडं च्वय् वंगु खः ।

थौं (२०२५ जनवरी ३१) बहनीसिया १०ः३५ताः इलय् तक उगु म्येया भ्यूज मुक्कं १ करोड ५५ हजार ६७० थ्यनेधुंकल ।

उगु म्ये २०२४ सेप्टेम्बर १४ कुन्हु ओएसआर डिजिटल युट्युब च्यानलय् रिलिज जूगु खः ।

थःगु म्येया सकसिनं ययेकाः थुलि लोकंह्वाकाब्यूगुलिइ म्येहालामि महर्जनं सकलसित सुभाय् देछानादीगु दु ।

‘जि प्रोफेसनल सिंगर मखु,सोंखय् म्ये छपु हाला । सःथेमसःथे हालागु म्येयात सकसिनं थपायसकं ययेकादिल, सकसित सुभाय् देछानाच्वना’ महर्जनया धापू खः ।

म्यूजिक भिडियो निर्देशक सुरेन्द्र तुलाधरं थःगु मिहिनेत पूवं थें ताःगु धयादिल ।

‘छपु बांलाःगु म्यूजिक भिडियो दयेकेगु कुतः यानागु खः । सकसिगु माया मतिना खंबलय् जिगु मिहिनेत पूवंथें ताःगु दु’ निर्देशक तुलाधरया धापू खः ।

सौरभ लामां छायाङ्कन यानादीगु व सुजन बडालं दृश्य सम्पादन यानादीगु म्यूजिक भिडियोस पल शाह व सृष्टि महर्जनं अभिनय यानादीगु दु ।

पवन जोशीं च्वयादीगु म्येयात अनिल तुलाधरं लय् तयेगुलिसें संगीत संयोजन यानादीगु दु ।