नेवाः फिल्म सोसाईटीया ग्वसालय् न्यान्हुयंकया संकिपा छायाङ्कन तालीम व कार्यशाला गोष्ठी येँय् न्ह्याःगु दु ।

थौं येँय् छगू ज्याझ्वः यासें कार्यशालाया उलेज्या याःगु खः । चलचित्र विकास बोर्डया नायः दिनेश डिसिं कार्यशालाया उलेज्या यानादिल ।

ज्याझ्वलय् न्ववासें बोर्ड नायः डिसिं नेपाःया आदिवासी जनजाति संकिपा ख्यःया उत्थान व संरक्षणया नितिं बोर्ड निरन्तर सक्रिय दुगु धासें हरेक खँय् सरकारयात ब्वः बियाच्वनेगु स्वयां थःपिं हे न्ह्यज्यायेत नं इनाप यानादिल ।

‘सरकारया ग्वाहालिं ज्याझ्वःत न्ह्याकाच्वंगु दइ, हाकनं सरकारं मस्वः नं धयाच्वंगु तायेदयाच्वनी, फेसबुकय् जक हालाच्वनेगु स्वयां सम्वन्धित निकायलिसे सहकार्य यानां न्ह्याःवनकि समस्याया समाधान लुयावइ’ नायः डिसिया धापू खः ।

वरिष्ठ दृश्य सम्पादक माणिक उराय व वरिष्ठ निर्देशक प्रकाश सायमिं थुकथंया कार्यशालाय् सीप सयेकेगु जक मखसें व सीपयात व्यवहारय् क्वकयाः नेवाः संकिपा ख्यःया उत्थानय् तिबः बीत सकसित इनाप यानादिल ।

सोसाइटीया निवर्तमान नायः बिराजकाजी राजोपाध्यायं नेवाःलिसें समग्र मातृभाषी संकिपा ख्यलं नीतिगत तगिमय् समस्या फयाच्वंगु खँ न्ह्यथँसें मूलधारया धयातःगु व्यावसायिक संकिपाया बजाः व मातृभाषी संकिपाया बजाःयात छगू हे स्वयेमज्यूगु बिचाः तयादिल ।

सोसाइटीया नायः लुःजः सिंहं सोसाइटीं थ्व हे असार दुने संकिपाय् संचार क्षमता विकास तालीम, छायाङ्कनया बृहत तालीम, उद्घोषण तालीम यायेत्यनागु जानकारी बियादिल ।

उगु हे ज्याझ्वलय् सोसाइटीया आजीवन व साधारण दुजःपिन्त म्हसीकापौ नं लःल्हाःगु खः । लिसें संस्थाया सल्लाहकारपिं नीर शाह, माणिक उराय् व प्रकाश सायमियात दसिपौ नं लःल्हाःगु खः ।

वइगु मंगलबाःतक जुइगु कार्यशालाय् सिनेमाटोग्राफरत्रय दिपक बज्राचार्य, लुःजः सिंह, गौतम श्रेष्ठ, फोटोग्राफर अमरेन्द्र श्रेष्ठ व निर्देशक योवन शाक्यं प्रशिक्षण बियादीत्यंगु दु ।