थुगुसीया ‘यल इतिल्हन सम्यक महादान पर्व’ वइगु फागुन ३० निसें चैत्र १ गतेतक जुइगु जूगु दु ।

हिरण्यवर्ण महाविहार, क्वाबहाःया ग्वसालय् ‘दिपंकर पर्व’ नामं नं म्हस्यूगु थुगु पर्व जुइत्यंगु खः ।

हिरण्यवर्ण महाविहारया स्वर्ण देगः दयेकूम्ह जुजु भाष्करदेवया सन्तति भलिभारों ‘त्रिरत्नया सुवालं धन चूलाःगु’ जुयाः बुद्धप्रति कृतज्ञ जुयाः श्रद्धा वदानया तातुनां थीथी विहारया दिपंकर बुद्ध, तारा व मेमेपिं बौद्ध द्यःपिंलिसें श्रामणेर, ब्रम्हचर्य भिक्षु, शाक्यभिक्षु व बज्राचार्य गुरुजुपिन्त ब्वनाः सम्यक महादान पर्व ग्वसाः ग्वःगु धापू दु ।

सम्यकया मू दिं फागुन ३० गते बुधबाः यलया १८ गू मूबहाः, बही, वादेय् (चापागाउँ), बुंगमति, किपू, येँ, यल, ख्वपया बहाःबहिलिं विशालकाय दिपंकर बुद्ध, आर्यतारा व मेमेपिं सम्यक द्यःपिं बहनीसिया ७ ताः इलंनिसें यल लाय्कुलिइ मुंकेगु ज्या जुइ ।

थुगु मुना लिपा बहनीसिया ९ताः इलय् थीथी सांस्कृतिक बाजं व लावालस्करलिसेंं वनाः ज्येष्ठवर्ण महाविहार तंगःबहालं श्री वसुन्धरा देवी द्यः यल लाय्कुलिइ हइसा अनंलि सकल दिपंकर बुद्ध व मेमेपिं द्यःपिं लस्करं यल लाय्कुलिं नागबहाल थ्यंकी ।

नागबहाल (सम्यक महादान स्थल) या ध्वाखाय् द्यःपिन्त लसकुस यानाःलि छसीकथं बिराजमान याकेगु परम्परा दु ।

चैत्र १ गतेसम्यक महादान जुइगु दिंकुन्हु सुथसिया ४ताः इलंनिसें न्हिनसिया १ बजेतक श्रद्धालु भक्तजनपिनिपाखें विराजमान दिपंकर बुद्ध व.मेमेपिं द्यःपिनिगु पूजा व दर्शन याकेगु लिसें नागबहाः ल्वहंहिति छचाःखेरं विशालरुप धाः व बाँसुरी बाजा ब्वज्या जुइ ।

थुबले हे थुगु पर्वया नितिं अक्षयकोष नीस्वनाब्यूगुलिं यल महानगरपालिकायात हनेगु ज्याझ्वः नं तयातःगु दु ।

न्हिनसिया २ ताः इलंनिसें ४ ताःईतक भूमिशोधन पूजालिसें दान बीगु ज्या जुइसा सनिलया ५ ताः इलय् दिपंकर बुद्ध व मेमेपिं द्यःपिं थःथःगु विहारय् लिहां बिज्याकीगु ज्याझ्वः दु ।

वि.सं. १८६१ तक दँय्दसं न्ह्यानाच्वंगु थुग पर्व उबलेया जुजु रणबहादुर शाहं सम्यक गुथिया जग्गा अधिकरण यानाकासेंलि आयस्था मगानाः प्यदँतकया आयस्था मुंकाः प्यदँ फुनाः न्यादँ क्यनेवं पर्व यायेगु परम्परा न्ह्याःगु खः ।

बुधवाः जूगु पत्रकार सम्मेलनय्जानकारी ब्यूकथं यलया नागबहालय् जुइगु थुगु पर्वया नितिं सम्यक भुतूपुज्यानाः सम्यक मरी छुइगु, नागबहाललय् प्रतिस्थापित बासुकी व चम्पक नागराजयागु प्राणप्रतिष्ठा लिकायेगु ज्या जुइधुंकूगु दु ।

अथे हे, फागुन २४ गते यःसिं थनाः हलिंपताः ब्वयेकेगु, फागुन २८ गते हिरण्यवर्ण महाविहारया दशपारमिता आजु व विसपारमिता आःजुपिंनाप ग्वसाः खलः सकलें बाजं थानाः सम्यक महादानया ब्वना ब्यूवनेगु ज्या ल्यंदनिगु पत्रकार सम्मेलनय् धाःगु खः ।