हलिं नेवाः दबू नेपाः देय् मू कवःया नायः सुरेन्द्र भक्त श्रेष्ठं थुगुसीया हलिं नेवाः दिंया ज्याझ्वः याकनं हे जुइगु धयादीगु दु ।

वंगु चैत्र १६ शनिबाःया नितिं क्वःछिनातःगु हलिं नेवाः दिंया ज्याझ्वः स्थगित जूगु सम्वन्धय् ईबुखँलिसे खँ ल्हासें कवःया नायः श्रेष्ठं थथे धयादीगु खः ।

‘मछिंगु परिस्थितीइ आकाझाकां ज्याझ्वः स्थगित यायेमाःगु व हथासं विज्ञप्ती पिथनाबलय् भचा अन्यौलया स्थिती जूगु दु । झीसं वंगु शनिबाःया नितिं जक ज्याझ्वः स्थगित यानागु खः, थुगुसी ज्याझ्वः स्थगित जूगु मखु । आः याकनं हे ज्याझ्वः यायेगु जुइ’ नायः श्रेष्ठं धयादिल ।

हलिं नेवाः दबुलिं दँयदसं मार्च महिनाया लिपांगु शनिबाः हलिं नेवाः दिं हनावःगु दु । व हे झ्वलय् हलिं नेवाः दबू नेपाः देय् मूकवलं चैत्र १६ शनिबाः ख्वपया लायकुलिइ हलिं नेवाः दिंया ज्याझ्वः यायेगु क्वःछिनातःगु खः ।

तर शुक्रबाः तीनकुनेय् राजावादीतय् प्रदर्शन अतिकं हिंसात्मक जुयाः संचारकःमि सुरेश रजक व सविन महर्जनया निधन जुइधुंकाः कवलं ज्याझ्वः स्थगित याःगु खः ।

कवलं विज्ञप्ती जारी यासें ज्याझ्वः स्थगित जूगु जानकारी ब्यूगु खः ।

आकाझाकां कार्यक्रम स्थगित यायेमाःगु स्थिती व हथासं विज्ञप्ती च्वयाः पिथनेमाःबलय् उकी गल्तीवश थुगुसीया ज्याझ्वः स्थगित धइगु खँग्वः लाःवंगु श्रेष्ठं धयादिल ।

याकनं हे ज्याझ्वः यायेत्यनागु व छुं दिनं हे ज्याझ्वःया दिं नं घोषणा यायेत्यनागु श्रेष्ठं ईबुखँयात कनादिल ।

थ्वयां न्ह्यः कवलं अराजक गतिविधि जुयाच्वंगु इलय् ज्याझ्वलय् घुसपैठ जुइफुगु सम्भावनायात तकं मनन यासें ज्याझ्वः स्थगित यानागु धाःगु खः ।

‘लिपांगु इलय् सुरक्षाया अवस्थातकं नाजुक जूवंगु जूगुलिं झीगु सांस्कृतिक सम्पदा क्षेत्रय् गुगुं नं कथंया घुसपैठ जुयाः झीगु सम्पदाय् हे लिच्वः लाकेफुगु खँयात गम्भीर मनन यासें थुगुसी हलिं नेवाः दिंया विशेष ज्याझ्वः स्थगित यानागु जुल’ विज्ञप्तीइ च्वयातःगु दु ।

विज्ञप्तमार्फत कवलं संचारकःमि रजक व किपूया महर्जन मदुगु प्रति शोक नं प्वंकूगु दु ।

‘म्हिगः राजावादीतयसं याःगु आन्दोलनं अराजक रुप कयाः हिंसात्मक व लूटया घटना जूवंगु व उगु घटनाय् थःगु पेशागत धर्म निर्वाह यानाच्वनादीम्ह नेवाः पत्रकार सुरेश रजक व नेवाः कायमचा सविन महर्जन मदुगु दुःख झी सकल नेवाःतयके दु’ विज्ञप्तीइ च्वयातःगु दु ।

व हे विज्ञप्तीमार्फत कवलं घटनाया निष्पक्ष छानविन यासें दोषीयात कडा कानुनी कारवाही यायेत सरकारयात जोडदार माग नं याःगु दु ।