मार्च ३० शनिबाः, अर्थात थुगुसीया मार्चया लिपांगु शनिबाः । हलिं नेवाः दबूया आह्वानय् दँयदसं मार्च महिनाया लिपांगु शनिबाः हलिं नेवाः दिं हनेगु यानाच्वंगु दु ।

हलिंन्यंक थीथी देशय् च्वनाच्वंपिं नेवाःतयसं थुगु दिनय् थीथी ज्याझ्वः यानाः हलिं नेवाः दिं हनेगु यानाच्वंगु दु ।

न्हयक्वःगु हलिं नेवाः दिंया झ्वलय् नेपाःया ज्याझ्वः म्हिगः शनिबाः यल लायकुलिइ केशव नारायण चोकय् जुल ।

हलिं नेवाः दबू नेपाः देय् मू कवःया ग्वसालय् जूगु ज्याझ्वलय् वरिष्ठ कलाकार मदनकृष्ण श्रेष्ठं भाषा सम्बन्धि थुगु ज्याझ्वलं थःत पुलांगु दिं लुमंकूगु धयादिल ।

‘न्हापा रेडियो नेपालया जीवन दबू ज्याझ्वः न्यने तसकं न्ह्यइपुसेच्वं । व हे ज्याझ्वलं मोहनि, स्वन्ति वःगु, गुंला वःगु सियाच्वनी । तर व ज्याझ्वः बन्द जूबलय् दक्व नेवाःतयसं साहित्यमार्फत थःगु विरोधया सः थ्वयेकूगु व दिं थौं लुमनाच्वन’ कलाकार श्रेष्ठं धयादिल ।

व हे इलय् गठन जूगु मुनासः संस्थां थौं थःत कलाकारया रुपय् थनेहःगु श्रेष्ठं धयादिल ।

हलिं नेवाः दबू नेपाः देय् मू कवःया नायः सुरेन्द्रभक्त श्रेष्ठं सन् २०१८य् नेपालय् ग्लोबल कन्फरेन्स यानाः हलिं नेवाः दिवस हनेगु न्ह्याःगु लुमंकादिल ।

‘हलिं नेवाः न्हियात राज्यपाखें मान्यता बीकाः पंचाग निर्णायक समितिया क्यालेन्डरय् दुथ्याकेत राज्ययात दवाब बियाच्वनागु दु । लिसें थगुने प्रधानमन्त्रीं नेवाः अध्ययन अनुसन्धान प्रतिष्ठान गठन यायेगु प्रतिवद्धता प्वंकादीगु खः । उकिया लागिं नं पहल जुयाच्वंगु दु, थुकी सकसिगु साथ माःगु दु’ नायः श्रेष्ठं धयादिल ।

हलिंन्यंक न्यनाच्वंपिं नेवाःतयत छगू हे दबुलिइ मुनाः नेवाः भाय्, तजिलजि व अधिकारया लागिं सः ल्ह्वनेगु छगू माध्यमया विकास यायेगु आज्जु दुगु दिवसयात सकसिनं थःगु हे तायेकाः हनेत वयकलं इनाप यानादिल ।

ज्याझ्वलय् थःथःगु ख्यलय् योगदान ब्यूपिं थीथी व्यक्तित्वयात हंगु नं खः ।

व झ्वलय् भाषा ख्यलं भाषासेवी राजा शाक्य, साहित्यपाखे वरिष्ठ साहित्यकार सुवर्ण शाक्य, चित्रकलापाखे वरिष्ठ चित्रकार किरण मानन्धर, कासा ख्यलं भारत्तोलनया महेश्वर महर्जनयात हंगु खः ।

अथेहे, स्वास्थ्य क्षेत्रय् नेपालय् दकले न्हापां किड्नी ट्रान्सफर याःम्ह डा. पुकार चन्द्र श्रेष्ठ, मिसा उद्यमी सुसन कर्माचार्य, पर्यटनपाखे अजय स्थापित, इतिहास अध्ययनय् वरिष्ठ इतिहासविद् योगेन्द्रमान श्रेष्ठ सम्मानित जुल ।

व हे कथं, कला ख्यलं वरिष्ठ कलाकार लिसें निर्देशक पवन जोशी, सामाजिक क्षेत्रय् समाजसेवी निलकाजी कसाः, पत्रकारिता क्षेत्रं वरिष्ठ पत्रकार सुरेश किरण मानन्धर, अन्तर्राष्ट्रिय संस्थाय् नेपाः पासा पुचः अमेरिका, मोफसलय् नेवाः संस्कृति, भाषाय् योगदान ब्यूगु झी पुचः विराटनगर, प्रशासन क्षेत्रं पूर्वमन्त्री लिसें आइजीपी ध्रुवबहादुर प्रधानयात ज्याझ्वलय् हंगु खः ।

ज्याझ्वलय् लोककवि राजभाइ जकःमिं च्वयादीगु व जुगल डंगोलं लसय् हनादीगु हलिं नेवाः म्येया नं विमोचन याःगु खः ।

लिसें दयारत्न शाक्यं च्वयादीगु नेवारलोजी माएटर्स सफूया नं विमोचन जूगु खः । ज्याझ्वलय् थीथी कलाकारपिनिगुपाखें सांगीतिक ज्याझ्वः नं जूगु खः ।

सन् २०११य् लण्डनय् डा. बाल गोपाल श्रेष्ठया नेतृत्वय् हलिं नेवाः दबू न्ह्याःगु खः ।