हलिं नेपालभाषा चिबाखं मुँज्या ११४५ थौं बहनीनिसें न्ह्याइगु जूगु दु ।

च्याक्वःगु हलिं नेवाः दिंया लसताय् हलिं नेवाः दबुलिं मुँज्याया ग्वसाः ग्वःगु खः । थौं बहनी नेपाली ई कथं ८ताः इलंनिसें जुम आयपपाखें अनलाइन मुँज्या न्ह्यायेत्यंगु दु ।

दबूया नायः संयुक्त श्रेष्ठं जानकारी बियादीकथं थौं मार्च १ निसें न्ह्याइगु चिबाखँं मुँज्या कन्हय् मार्च २, अनंलि मार्च ८, ९, १५ व १६ तारीखय् जुइ ।

मुँज्याय् चिबाखं च्वमितयसं निसः खँग्वः दुने चिबाखं न्यंकेत्यंगु दु ।

चिबाखं च्वमि अपर्णा प्रधान, प्रमिला सायमि, बिमल ताम्राकार, यज्ञरत्न धाख्वाः, राज सायमि, राजेश्वरी राजोपाध्याय, रीता महर्जन, लक्ष्मी कुमार महर्जन, सजगता मानन्धर, सौरभ शाक्य, अन्जना ताम्राकार, कामना मानन्धर, कृष्णभक्त बोडेलिसें ७४म्ह बाखं च्वमितयसं मुँज्याय् बाखं ब्वनाः न्यंकेत्यंगु दु ।

व हे कथं नेपालभाषा साहित्य ख्यलय् योगदान बियावंपिं वरिष्ठ भाषासेवीपिं मास्टर जगत सुन्दर मल्ल, प्रेमबहादुर कसाः, धुँस्वां सायमि, दुर्लभलाल सिं, गोविन्द मान श्रेष्ठया बाखं तकं मुँज्याय् न्यंकीगु जूगु दु । बाखँ मुँज्या ज्याझ्वलय् वयकःपिनिगु बाखं रेकर्ड हायेकेगु जानकारी ग्वसाः खलकं ब्यूगु दु ।

मुँज्याय् वाचन जुइगु बाखंया समीक्षा प्रा. प्रेमशान्ति तुलाधर, सह प्रा. प्रेमहिरा तुलाधर, प्राज्ञ लक्ष्मी माली, डा. दिनेश राज भुजु, डा. सुशील ताम्राकार, डा. बज्रमुनि बज्राचार्यं यानादीत्यंगु दु ।

ज्याझ्वलय् मू पाहांकथं बौद्ध विद्वान फणिन्द्र रत्न बज्राचार्यया उपस्थिती दइगु जूगु दु ।