येँ महानगरपालिका १८ वडाया वडाध्यक्ष लिसें कलाकार, साहित्यकार न्हुछेँकाजी महर्जनं च्वयादीगु प्यपु म्येया म्यूजिक भिडियो छक्वलं सार्वजनिक जूगु दु ।

वडाध्यक्ष महर्जनं च्वयादीगु म्येत ‘मतिनाया सर्गतय्’, ‘गुँया कापिइ हायाच्वंगु’, ‘छंगु मतिना’ व ‘मांया यःम्ह मचा’ या म्यूजिक भिडियो सार्वजनिक जूगु खः ।

वंगु शुक्रबाः येँ मपा १८ वडां येँय् ग्वसाः ग्वःगु छगू ज्याझ्वलय् प्रतिनिधि सभा सदस्य कृष्ण गोपाल श्रेष्ठ व येँ महानगरपालिकाया निवर्तमान प्रमुख विद्यासुन्दर शाक्यं उगु म्यूजिक भिडियो सार्वजनिक यानादिल ।

ज्याझ्वलय् न्ववासें प्रतिनिधि सभा सदस्य श्रेष्ठं स्थानीय भाषा, कला, संस्कृतिया संरक्षण सम्वर्द्धन व प्रवर्द्धनय् येँ मपा १८ वडां न्ह्याकाच्वंगु पलाःया प्रशंसा यानादिल ।

सार्वजनिक जूगु म्येमध्ये ‘मतिनाया सर्गतय्’ या कोरीयोग्राफी व निर्देशन सुरज नापितं यानादीगु दु ।

अनुज शाक्य व हसना महर्जनया मुख्य भूमिका दुगु म्येया छायाङ्कन व दृश्य सम्पादन सोहन मानन्धरं यानादीगु दु ।

मनराजा नकःमिं लसय् हनादीगु म्ये रोजी श्रेष्ठ डंगोलं हालादीगु दु ।

लोक लसय् आधारित ज्वःम्ये ‘छंगु मतिना’य् सानुबाबु महर्जन व निशा देसारं सः बियादीगु दु ।

म्यूजिक भिडियोया निर्देशन पवन जोशीं यानादीगु दु । थुगु म्येय् रुक्साना महर्जनलिसें वडाध्यक्ष महर्जनं अभिनय यानादीगु दु ।

छायाङ्कन व दृश्य सम्पादन सोहन मानन्धरं यानादीगु दु ।

अथेहे, अनिल तुलाधरया लसय् हनालीगु म्ये ‘गुँया कापिइ हायाच्वंगु’ नांजाःम्ह म्येहालामि संजीप प्रधानं हालादीगु दु ।

पवन जोशीं निर्देशन यानादीगु म्यूजिक भिडियाय् सपना डंगोललिसें म्ये च्वमि व वडाध्यक्ष महर्जनं हे अभिनय यानादीगु दु ।

छायाङ्कन व दृश्य सम्पादनया ज्या सोहन मानन्धरं हे यानादीगु दु ।

अनिल तुलाधरं लय् तयादीगु ज्वःम्ये ‘मांया यःम्ह मचा’ किशोर कुमार शाही व शुद्धलक्ष्मी श्रेष्ठं हालादीगु दु ।

म्यूजिक भिडियोया छायाङ्कन विजय सिंहं यानादीगु दुसा दृश्य सम्पादन सोहन मानन्धरं यानादीगु दु ।

थुगु म्येया म्यूजिक भिडियो कल्पनाय् आधारित बाखनय् एक्सन कट यानाः मखसें धात्थेंया मचा जंक्वया भिडियोलय् दयेकागु जानकारी म्येच्वमिलिसें वडाध्यक्ष महर्जनं बियादिल ।

प्यपु म्ये मध्ये ‘मतिनाया सर्गतय्’, ‘छंगु मतिना’ व ‘गुँया कापिइ हायाच्वंगु’ संसार्स अनालाइन टिभि युट्युब च्यानलमार्फत सार्वजनिक जुइधुंकूगु दु ।

‘मांया यःम्ह मचा’ वइगु बिहिबाः संसार्स अनलाइन टिभि युट्युब च्यानलमार्फत हे सार्वजनिक जुइगु संसार्स क्रिएसन्सया क्रिएटिभ डाइरेक्टर स्वतन्त्र महर्जनं जानकारी बियादिल ।