येँ महानगरपालिका २२ वडाया वडाध्यक्ष चिनीकाजी महर्जनं आःया अवस्थाय् मेयर बालेन साहं थःगु वडायात केन्द्रं ब्यागः तयाब्यूगु अनुभुति जूगु धयादीगु दु ।

वडा ज्याकू संकटाय् पत्रकारतलिसे खँ ल्हासें वडाध्यक्ष महर्जनं कामपा २२ वडाया न्हूसडक लागाय् पार्किङ पूर्ण रुपं निषेध याःगु सम्वन्धय् थःपिंलिसे छु नं सरसल्लाह मयाःसे निर्णय लादे यायेत स्वःबलय् थःपिन्त ब्यागः तयाब्यूगु महसूस जूगु धयादिल ।

‘उजंया जानकारी बीगुयात सहलह ब्याकुगु धाइमखु । मेयर बालेन साहं जितः वा सरोकारवाला सुं नापं छुं सहलह मयाःसे थः यत्थे यायेत स्वल, थ्व जिपिं वडाबासीतयत मान्य मजू’ वडाध्यक्ष महर्जनं धयादिल ।

मेयरं उजं न्यंकेगु व मेपिंस उकी खः जक धयाच्वनेमाःगु खःसा वडाध्यक्ष व वडा सदस्यया निर्वाचन हे छाय् यायेमाल धकाः महर्जनं न्ह्यसः तयादिल ।

दक्वं ज्या मेयर याकःचां याये व स्वये फइमखु धकाः हे वडाध्यक्ष, वडा सदस्यत माःगु धासें महर्जनं वडानाप समन्वय, सहकार्य याना ज्या यायेत मेयर बालेनयात छ्याता बियादिल ।

बजारय् हल्ला जू थें थःपिं गबलें नं सशुल्क पार्किङया पक्षय् मदुगु तर, न्हूसडक क्षेत्रय् निःशुल्क व्यवस्थित पार्किङया व्यवस्था धाःसा जुइमाःगु वडाध्यक्ष महर्जनया धापू खः ।

येँया दकले व्यस्त व्यापार लागा न्हूसडकय् पार्किङया सुविधा मदुसा स्थानीय व्यापारीत विस्थापित जुइमाःगु अवस्था वइगु महर्जनया दावी दु ।

‘न्हूसडक थेंजाःगु व्यापारिक क्षेत्रया माग धयागु निःशुल्क व्यवस्थित पार्किङ खः । आः गणतन्त्रय् जनताया माग व आवश्यकता कथं नेतृत्वं ज्या यायेगु खः, नेतृत्वं उजं लादे यायेगु मखु’ वडाध्यक्ष महर्जनं धयादिल ।

थ्वयां न्ह्यः तत्कालीन मेयर विद्यासुन्दर शाक्यं स्मार्ट पार्किङया ठेक्का ब्यूबलय् नं थःपिंस विरोध यानागु लुमंकुसें नेतृत्वं गबलें स्थानीय वासिन्दाया माग कथं ज्या मयाःगु धासें महर्जनं दुःख प्वंकादिल ।

केशव स्थापितया कार्यकालनिसें हे न्हूसडकया स्थानीय व्यापारीतय्सं सीमित व पायछि थासय् निःशुल्क व्यवस्थित पार्किङया माग यानावःगुलि व मागया सुनुवाई यायेगुपाखे थौंतक नं नेतृत्वं वास्ता मयाःगु महर्जनं धयादिल ।

न्हूसडकया स्थानीय व्यापारी लिसेंं खिचापोखरी न्हूसडक व्यापार संघया अध्यक्ष सागर शाक्यं ७२ सालया भुखाय् व कोभिड महामारीं क्वदःगु व्यापार क्षेत्रय् बल्ल छुं ह्यूपाः खनेदयावःगुलिइ न्हूसडकय् पार्किङ पूर्ण रुपय् निषेध याःबलय् थःपिं विस्थापित जुइमाःगु अवस्था वःगु धयादिल ।

भुखाय् व कोभिड महामारीया अवस्थाय् कर छुट तक्क मब्युगु राज्यं आः झन न्हूसडकयागु व्यापार पुरा हे मदयेका छ्वयेत हेस्वःगु खः ला थें खनेदूगु शाक्यया धापू खः ।

‘छेँबुँ बैंकय् बरः तयाः काःगु त्यासां व्यापार यायेत च्वनाच्वनागु दु । राज्यं छु नं सुविधा मब्युगु ला म्वाःल, अझ अःखतं ग्राहकयात पार्किङया सुविधा तकं लाका कायेत स्वःगु धयागु ला जिमित द्यांलाकाः स्याना हे छवयेत स्वःगु खनेदत’ शाक्यं धयादिल ।

पार्किङया सुविधा मदयक व्यापारया कल्पना नं याये मफइगु शाक्यं धयादिल ।

स्थानीय वासिन्दा नापं साधारण क्लब गणबहालया अध्यक्ष राधाकृष्ण महर्जनं मेयरया भिंगु ज्याया समर्थन यानाच्वनागु खःसां बांमलाःगु ज्यायागु विरोधय् सडकय् कुहां वयेमाःसां लिचिलेमखुगु धयादिल ।

‘काठमाडौं मलया अनाधिकृत संरचना थुंबलय् समर्थनय् कुहांवयापिं नं जिपिं हे खः । आः स्थानीय वासिन्दा, संघसंस्था, व्यापारी व वडालिसे छुं हे समन्वय मयासे याःगु थ्व अव्यवहारिक निर्णयया विरोधय् सडकय् कुहां वयेमाःसां लिचिलेमखु’ महर्जनया धापू खः ।

पत्रकार सम्मेलनय् उपस्थित व्यापारी, स्थानीय संघसंस्थाया नापं दलीय प्रतिनिधि, पेशाकर्मीतयसं मेयर बालेनया अव्यवहारिक निर्णय विरुद्ध छधी जुयाः विरोधय् कुहांवयेगु धाःगु खः ।