येँ दुने दुगु महाविहार व बज्राचार्यतय् बारे जानकारीमूलक सफू पिदंगु दु । बौद्ध विद्वान फणीन्द्र रत्न बज्राचार्यं च्वयादीगु निगु सफू ‘बज्राचार्य’ व ‘येँ देयया महाविहार’ पिदंगु खः ।

शनिबाः बज्राचार्य क्लब येँय् याःगु छगू ज्याझ्वलय् थुगु निगुलिं सफूया विमोचन याःगु खः ।

बौद्ध विद्वान यज्ञमानपति बज्राचार्य, बागमती प्रदेश सभासद्द्वय शैलेन्द्रमान बज्राचार्य व नुरज बज्राचार्य, येँ महानगरपालिका उपप्रमुख सुनिता डंगोल, बज्राचार्य संरक्षण गुथिया नायः सागरमान बज्राचार्य, येँमपा सम्पदा तथा पर्यटन विभागया कजि आशाराम संगत, नेवाः देय् दबूया नायः पवित्र बज्राचार्य, वज्रयान महासंघया नायः डा. राजेन्द्रमान बज्राचार्य व क्लबया नायः सर्जु बज्राचार्यं सफूया मंकाः विमोचन यानादिल ।

‘बज्राचार्य“ सफुतिइ नेपालया प्राचीनता, बौद्ध धर्म इतिहास, बज्राचार्यया म्हसीका, दीक्षा बीपिं बज्राचार्यत, चर्या गीतकार, लिपिकार, ग्रन्थकार, साहित्यकार, च्वमि लिसें थीथी ख्यलय् योगदान ब्यूपिं बज्राचार्यतय्गु बःचाहाकःगु म्हसीका दुथ्याकातःगु दु ।

अथेहे, लिपांगु इलय् लूगु न्हूगु तथ्य नं कःघानाः ‘येँ देयया महाविहार’ सफू च्वयातःगु दु ।

‘बज्राचार्य’ व ‘येँ देयया महाविहार’ सफू बौद्ध धर्म अध्येतातय् लागिं महानगर दुने दुगु महाविहारया अध्ययन यायेत तसकं ज्याख्यलय् वइगु दावी क्लबं याःगु दु ।

उगु हे ज्याझ्वलय् बौद्ध विद्वान फणीन्द्ररत्नं थः दीक्षा गुरुमां नन्दकुमारी बज्राचार्ययात सम्मान नं यानादीगु खः ।

लिसें दीक्षा गुरु, गुरुमां बुद्ध रत्न बज्राचार्य व रुपकमल बज्राचार्य, ज्ञानी राजा बज्राचार्य व पूर्णकुमारी बज्राचार्य, अष्टरत्न बजाचार्य व पुष्पतारा बज्राचार्य, प्रा. डा. नरेशमान बज्राचार्य व नीता बज्राचार्य, पुण्यरत्न बज्राचार्य व अष्टलक्ष्मी बज्राचार्ययात नं सम्मान याःगु खः ।

ज्याझ्वलय् चर्यागुरुपिं नरेन्द्रमुनि बज्राचार्यं जयजय व मणिरत्न बज्राचार्यं वज्रसत्व रागमाला न्ह्यब्वयादीगु खः । ज्याझ्वलय् क्लबं ग्वसाः ग्वःगु चर्यानृत्य प्रशिक्षणया ब्वतिमि मचातयसं कल्पना बज्राचार्यया नृत्य निर्देशनय् चर्या नृत्य न्ह्यब्वयादीगु खः ।