Apexcoder  tech

नेपालभाषााया स्वपु म्यूजिक भिडियाे छक्वलं सार्वजनिकः भिडियाेलिसें

eBukhan – बिराज,    २०८१ मङ्सिर १६, आइतबार    वर्गीकृत मनोरञ्जन

मतिना इन्टरटेनमेन्टं नेपालभाषाया स्वपु म्यूजिक भिडियो छक्वलं पिथंगु दु ।

वंगु बिहिबाः येँय् छगू ज्याझ्वः यासें मतिनां नेपालभाषाया स्वपु म्यूजिक भिडियो छक्वलं सार्वजनिक याःगु खः । ज्याझ्वलय् ‘लिक्क लिक्क’, ‘पानवती मैयाँ’ व ‘छंगु मतिना’ म्येया म्यूजिक भिडियो सार्वजनिक जूगु खः ।

नेपाली संकिपा ख्यःया आमा धकाः म्हस्यूम्ह ‘आमा’ संकिपाय् आमाया भूमिका म्हितादीम्ह वरिष्ठ अभिनेत्री चैत्यदेवी सिंहया उपस्थितीइ उगु म्यूजिक भिडियोत सार्वजनिक जूगु खः ।

ज्याझ्वलय् न्ववासें वरिष्ठ अभिनेत्री सिंहं वर्तमान इलय् नेपालभाषाया कला ख्यलय् मिसा कलाकारलिसें मिसा निर्देशक नं खनेदयावःगुलिइ लसता प्वंकादिल ।

ग्वसाः खलःपाखें न्वसों निर्देशकलिसें कलाकार आराध्यालक्ष्मी खड्गी, कलाकारलिसें मतिना इन्टरटेनमेन्टया संस्थापक विजयमान सिंहं थःपिन्सं तसकं मिहिनेत यानाः स्तरीय म्यूजिक भिडियो दयेकेगु कुतः यानागु धासें नेवाः कला ख्यः व कलाकारयात हःपाः बीत इनाप यानादिल ।

ज्याझ्वलय् वरिष्ठ म्येहालामि जुजुकाजी रंजित, वरिष्ठ कलाकार नारायणदेवी प्रधान, राजमति संकिपाया नकिं हिसिला महर्जन, वरिष्ठ निर्देशक प्रकाश सायमि, वरिष्ठ सिने पत्रकार विजयरत्न तुलाधरलिसें नं थःथःगु नुगःखँ तयादीगु खः ।

लिसें ‘छंगु मतिना’ व ‘पानवती मैयाँ’ म्यूजिक भिडियोया सह कलाकार सुर्जलक्ष्मी खड्गी व  ‘छंगु मतिना’या म्येहालामि राजकुमार मानन्धरं थःथःगु अनुभव न्यंकादीगु खः ।

ज्याझ्वलय् म्ये व म्यूजिक भिडियो दयेकेत ग्वहालि याःपिं कलाकार, प्राविधिकतयत सम्मान याःगु खः । लिसें कलाकार, निर्देशक खड्गीया अजि विजुलीमाया खड्गीयात विशेष सम्मान याःगु खः ।

सार्वजनिक जूगु म्ये ‘लिक्क लिक्क’ या म्येग्वः च्वयेगु, लय् तयेगु ज्या डबल शाक्यं यानादीगु दुसा सः शाक्य व रत्नशोभा महर्जनं बियादीगु दु ।

आराध्यालक्ष्मी व श्रीकृष्ण खड्गीं अभिनय यानादीगु म्यूजिक भिडियोया निर्देशन राजेशमान सिंहं यानादीगु दु ।

अथेहे, आनन्द रत्न बज्राचार्यया म्येग्वः व अनिल तुलाधरया लय् दुगु ‘पानवती मैयाँ’ म्ये निशा देसारं हालादीगु दु । आराध्यालक्ष्मीं विजयमान सिंहलिसे अभिनय यायेगुलिसें म्यूजिक भिडियोया निर्देशन नं यानादीगु दु ।

राजकुमार मानन्धरं ‘छंगु मतिना’ म्ये च्वयेगु, लय् तयेगु लिसें हाला नं दीगु दु । गायनय् राजकुमारयात निशा देसारं साथ बियादीगु दु ।

थ्व म्यूजिक भिडियोलय् नं विजयमान सिंह व आराध्यालक्ष्मीं अभिनय यानादीगु दु । कोरीयोग्राफी व निर्देशन नं आराध्यां हे यानादीगु दु ।

स्वपुं म्यूजिक भिडियाया छायाङ्कन व दृश्य सम्पादन सोहन मानन्धरं यानादीगु दु ।

‘छंगु मतिना’ या म्यूजिक भिडियो मतिना इन्टरटेनमेन्ट युट्युब च्यानलं सार्वजनिक जुइधुंकूगु दु ।

‘पानवती मैयाँ’ व ‘लिक्क लिक्क’या म्यूजिक भिडियो नं छुं दिनं हे मतिना इन्टरटेनमेन्ट युट्युब च्यानलय् हे सार्वजनिक जुइगु जानकारी निर्देशक, कलाकार आराध्यालक्ष्मीं बियादिल ।