वइगु बैसाख २४ गते योया बसन्तपुलिइ छगू भव्य समारोह यासें बागमति प्रदेश सरकारी कामकाजया भाषा सम्वन्धय् व्यवस्था यायेत दयेकूगु ऐन २०८० शुभारम्भ घोषणा जुइगु जूगु दु ।

बागमति प्रदेश संस्कृति पर्यटन तथा सहकारी मन्त्रालयले समारोहया ग्वसाः ग्वयेत्यंगु खः ।

थुगु घोषणा सभालिसें उगु ऐन कार्यान्वयनय् वनी व बागमति प्रदेशय् नेपालभाषा व तामाङ भाषां कामकाजी भाषाया थाय् काइ ।

थ्व हे दथुइ, मन्त्रालयं प्रधानमन्त्री पुष्पकमल दाहालयात उगु समारोहस मू पाहांया रुपं उपस्थित जुइत ब्वंगु दु ।

बागमति प्रदेशया मुख्यमन्त्री शालिकराम जम्कट्टेल, संस्कृति पर्यटन तथा सहकारी मन्त्री शैलेन्द्रमान बज्राचार्यलिसेंया टोली वनाः प्रधानमन्त्री दाहालयात ब्वनापौ लःल्हाःगु खः ।

प्रधानमन्त्री दाहालयात खस नेपालीलिसें नेपालभाषा व तामाङ भाषां च्वयातःगु ब्वनापौ लःल्हाःगु खः ।

बागमति प्रदेश संस्कृति पर्यटन तथा सहकारी मन्त्री बज्राचार्यं कलात्मक झ्याःया फ्रेमय् तयाः उगु ब्वनापौ लःल्हानादीगु खः ।

प्रधामन्त्री दाहालयात ब्वनापौ लःल्हायेत मुख्यमन्त्री जम्कट्टेल व मन्त्री बज्राचार्यलिसें बागमति प्रदेशया कानूनमन्त्री गंगानारायण श्रेष्ठ, नेवाः देय् दबूया नायः पवित्र बज्राचार्य, देय् दबूया निवर्तमान नायः नरेश ताम्रकारलिसें थ्यंगु खः ।

ब्वनापौ लःल्हानाकासें प्रधानमन्त्री दाहालं थुगु कथंया ऐतिहासिक समारोहस थः उपस्थित जुइखनीगुलिइ थः नं तसकं लयतायागु धासें ज्याझ्वलय् वयेगु बचं बियादीगु खः ।

समारोहस नेवाः लिसें तामाङ समुदायपाखें उल्लासमय उपस्थिती दइगु मन्त्रालयं दावी याःगु दु ।