‘सुथसिया निभाः’ म्येया कभर कासा जुइगु
eBukhan – ईबुखँ डेस्क, २०८२ जेठ ११, आइतबार वर्गीकृत मनोरञ्जन
म्येहालामि पुरुषोत्तम श्रेष्ठया म्ये ‘सुथसिया निभाः जुयाः’या कभर कासा जुइगु जूगु दु ।
म्ये कभर कासाया ग्वसाः खलः कन्फराक्टीभ मिडिया सोलुसन प्रा लिं शनिबाः येँय् पत्रकार सम्मेलन यानाः कासाया घोषणा याःगु खः ।
न्हूम्ह गायन प्रतिभा मालेत लिसें कला, संगीत ख्यःयात चलायमान दयेकातःगु आज्जुं कासाया ग्वसाः ग्वयागु ग्वसाः खलकं धाःगु दु ।
ज्याझ्वलय् म्ये कभर कासा कजिलिसें ग्वसाः खलः कन्फराक्टीभ मिडिया सोलुसनया प्रमुख कार्यकारी अधिकृत बिराजकाजी राजोपाध्यायं कला, संगीत ख्यःयात चलायमान दयेकातःगु आज्जुं संस्थां न्हापा नं थीथी गतिविधि, ज्याझ्वः यानावयागु व उकिया हे झ्वलय् थुगु कासाया ग्वसाः ग्वयागु धयादिल ।
हलिंया गुगु नं भूगोल, वर्ग, समुदाय, क्षेत्रं कासाय् ब्वति कायेफइगु जानकारी राजोपाध्यायं बियादिल ।
‘थ्व नेवाः म्येया कभर कासाय् नेवाः, गैर नेवाः जक मखसें, गैर नेपाःमिं तकं ब्वति कायेफइ । भूगोल, वर्ग, समुदाय आदिया नामं सुं नं प्रतिभायात पनेगु जुइमखु’ कजि राजोपाध्यायं धयादिल ।
थःगु म्येया कभर कासा जुइत्यंगुलिइ म्येहालामि श्रेष्ठं लसता प्वंकादिल ।
‘जिगु म्येय् थुकथं कभर कासा जुइत्यंगु धइगु जिगु नितिं लसताया खँ खः । ग्वसाः खलःयात जिं सुभाय् बियाच्वना व सकसित कासाय् ब्वति कायेत इनाप नं यानाच्वना’ श्रेष्ठं धयादिल ।
म्येहालामि श्रेष्ठया हे युट्युब च्यानल Puru Shrestha अपलोड जुयाच्वंगु ‘सुथसिया निभाः’ म्येया काराओके ट्राएकय् म्ये हालाः भिडियो दयेकाः कासाय् ब्वति कायेफइगु ग्वसाः खलकं धाःगु दु ।
थम्हं हालागु म्येया भिडियो ग्वसाः खलःयात ईमेलय् छ्वयाहयेत ग्वसाः खलकं इनाप याःगु दु ।
वइगु तछलागा द्वादशी (असार ८ गते) दुने उकथं ईमेलय् वइगु भिडियोयात कासाय् दुथ्याकेगु व उगु भिडियो मध्ये प्रतिभावान प्यम्ह म्येहालामियात रेकर्डिङ, म्यूजिक भिडियो सूट, फोटो सूट, गिफ्ट ह्याम्परलिसेंया सिरपाः बीगु ग्वसाः खलकं धाःगु दु ।
