येँया रत्न राज्यलक्ष्मी क्याम्पसया करिब ४५दँया इतिहास कुबियाच्वंगु सुकुन्दा साहित्य पालां महाकवि गिरिजाप्रसाद जोशीया ८६दँया बुदिं हंगु दु ।

जुममार्फत जूगु ज्याझ्वलय् वर्ल्ड नेवाः अर्गनाइजेशनया संस्थापक नायः डा. बालगोपाल श्रेष्ठं महाकवि गिरिजा प्रसाद जोशीं थःपिन्त भाग्योदय मा.वि.इ शिक्षक जुयाः अंग्रेजी व नेपालभाषा विषय ब्वंकादीगु लुमंकादिल ।

‘वयकलं विद्यार्थीतयत हस्तलिखित पत्रिका पिथने बियादिल । लिसें वयकः हे उपस्थितीइ जि संस्थापक नायः जुयाः सक्वय् भाषा साहित्य मुँज्या खलः नीस्वनाः थीथी साहित्यिक, सांस्कृतिक ज्याझ्वः यानागु थौं जिं लुमंकाच्वनागु दु’ श्रेष्ठं धयादिल ।

महाकवि जोशीं च्वयाः व लय तयाः जनताया म्ये हालेगु याःगु नं अर्गनाइजेसनया संस्थापक नायः श्रेष्ठं लुमंकादिल ।

ज्याझ्वलय् छुं दिं न्ह्यः जक मदुम्ह नेपालया न्हापांम्ह केमीकल इन्जियर व साहित्यकार राजदास श्रेष्ठप्रति श्रद्धान्जली प्वंकूगु खः ।

पालाया छ्यान्जे रिदेन महर्जनं वइगु दिनय् नेपालभाषा व साहित्य ख्यलय् ज्वः मदुगु योगदान ब्यूपिनिगु हनाय् साहित्यिक ज्याझ्वःत यानावनेगु धयादिल ।

उगु हे ज्याझ्वलय् रत्न राज्यलक्ष्मी क्याम्पसं नेपालभाषा विषयय् प्यंगू तह पूवंकूम्ह रुपा शाही, साहित्यकार रामेश श्रेष्ठ, पालाया छ्यान्जे महर्जनलिसें प्रशान्त डंगोलं थःथःगु साहित्यिक सृजना न्ह्यब्वयादीगु खः ।