येँ महानगरपालिका (येँमपा) या महानगर दुनेया थीथी अस्पतालय् फोहोर व्यवस्थापनया अनुगमनया ज्या निरन्तर जुयाच्वंगु दु ।

येँमपा उप प्रमुखया नेतृत्वय् अनुगमन टोलीं न्हिथं धइथें अस्पतालय् वनाः अनुगमन यायेगु व आवश्यकता कथं सुझाव बीगु वा कारवाही यायेगु यानाच्वंगु दु ।

थ्व हे झ्वलय् अनुगमन टोलीं शुक्रबाः येँया दकले पुलांगु अस्पताल बीर व ट्रमा सेन्टर थ्यंगु खः ।

ट्रमा व बीरया फोहोर व्यवस्थापनया अनुगमनया झ्वलय् निगुलिं अस्पतालं संक्रमित फोहोर सामान्य दयेकेत न्ह्याकूगु कुतः सन्तोषजनक ताःगु येँमपा उपप्रमुख डंगोलं धयादिल ।

‘चिचीधंगु त्रुटि व त्वःफ्यूगु प्रक्रियात दु । व प्रक्रिया सुधार यानाः उत्कृष्ट व नमूना दयेकेमाः’ उपप्रमुख डंगोलया नेतृत्वय् वंगु अनुगमन टोलीं सुझाव ब्यूगु खः ।

ट्रमा सेन्टरय् मासिक ९द्वः किलो फोहोर उत्पादन जुइ, गुकी संक्रमित फोहोर निद्वः व ४सः केजी दु । मेगु जैविक फोहोर खः ।

सामान्य बेड, सघन कक्ष व आकस्मिक कक्ष, चिकित्सां उत्पादन जुइगु फोहोर वर्गीकरणया प्रक्रिया, स्रोतय् वर्गीकरण जूगु फोहोर ढुवानी यानाः निर्मलीकरण व भण्डारणतक यंकीगु विधि, थ् झ्वलय् लीगु सुरक्षाया उपाय थःपिन्सं स्वयागु डंगोलं जानकारी बियादिल ।

‘थन उत्पादन जुइगु फोहोर वर्गीकरणया प्रक्रिया, स्रोतय् वर्गीकरण जूगु फोहोर ढुवानी यानाः निर्मलीकरण व भण्डारणतक यंकीगु विधि, थ्व झ्वलय् लीगु सुरक्षाया उपाय स्वयागु खः । अभ्यास सन्तोषजनक हे जू । सुधारया छुं थाय् नं खनेदुगुलिइ सुधार यायेत अस्पतालयात धयागु दु’ डंगोलं धयादिल ।

वीर अस्पतालं मासिक २७द्वः व ५सः किलो फोहोर उत्पादन जुइगु याः । गुकी ५द्वः व ३६ किलो ध्वगिनावनीगु फोहोर दु ।

स्रोतय् फोहोर ल्वाकज्यायेफुगु, ढुवानी व प्रशोधन ज्या याइम्ह मनूया सुरक्षा, भण्डारण कक्षया प्रबन्ध व पिने छ्वयेगु फोहोरय् धार दुगु व जोखिमयुक्त फोहोर ल्वाकज्यायेफुगु खतरां बचे यायेत सुझाव ब्यूगु खः ।