म्येहालामि केशव तण्डुकारया न्हूगु नेवाः म्ये ‘हिसि दुगु किपा’ पिदंगु दु ।

म्येहालामि तण्डुकारया थुगु म्येया म्यूजिक भिडियो थौं अडियो नेपाल युट्युब च्यानलमार्फत सार्वजनिक जूगु खः ।

तण्डुकारं करीब १८दँया दिपाः धुंकाः थःगु म्ये सार्वजनिक जूगु इलय् थः तसकं लयताःगु धयादिल ।

‘करीब ६४/६५ सालतक धइथें म्ये हालाच्वनागु, दथुइ सांगितिक यात्रा दित । आः हाकनं थ्व म्येलिसे संगीत ख्यलय् लिहांवयागु दु । सकसिनं म्ये न्यना, स्वयाबीत इनाप याना’ तण्डुकारं धयादिल ।

तण्डुकारया थ्वयां न्ह्यः ‘जिं छन्त ययेकागुलिं’ म्येचाः हे पिदंगु दुगु खः । वयां लिपा तण्डुकार संगीत ख्यलय् खने मदयावंगु खः ।

‘उगु इलय् छेँ नं स्वयेमाल, जिम्मेवारीं क्वत्यल । अयजुयाः संगीत क्षेत्रं दिपाः कायेमाल । आः टिकटकय् भचा भचा म्ये हाहां बुलुहुँ न्ह्याःवँवं थ्व म्ये पिथनागु दु’ तण्डुकारं धयादिल ।

थौं सार्वजनिक जूगु तण्डुकारया थुगु म्येया म्येग्वः अमृत रत्न शाक्यं च्वयादीगु दुसा म्येयात लसय् हनेगुलिसें म्यूजिक भिडियोया छायाङ्कन व दृश्य सम्पादन बुद्ध सायमिं यानादीगु दु ।

कागेश्वरय् छायाङ्कन यानातःगु म्येय् सोनिया धौभडेल व किरण जोशीं अभिनय यानादीगु दु । म्यूजिक भिडियोया निर्देशन मीरा डंगोलं यानादीगु दु ।