म्येहालामि पुरुषोत्तम श्रेष्ठया नेपालभाषाया म्ये ‘सुथसिया निभाः जुयाः’ सार्वजनिक जुइगु जूगु दु ।

कन्हय् सोमबाः येँय् छगू ज्याझ्वः यासें उगु म्येया म्यूजिक भिडियो सार्वजनिक यायेत्यंगु खः ।

नेपाःया न्हापांगु संकिपा ‘आमा’या आमा चैत्यदेवी सिंहं उगु म्यूजिक भिडियो सार्वजनिक यानादीगु ज्याझ्वः दुगु म्येहालामि श्रेष्ठं धयादिल ।

थःगु म्ये सार्वजनिक जुइत्यंबलय् थः तसकं उत्साहित दुगु श्रेष्ठं धयादिल ।

‘बांलाःगु म्ये दयेकेत जिपिं दक्वसिनं मिहिनेत यानागु दु । स्वकुमि, न्यनामिं मतिना, साथ बियादी धइगु विश्वास दु’ श्रेष्ठं धयादिल ।

ज्याझ्वः धुंकाः थःगु हे युट्युब च्यानलमार्फत म्ये विश्वब्यापी सार्वजनिक जुइगु जानकारी नं श्रेष्ठं बियादिल ।

सार्वजनिक जुयत्यंगु उगु म्यूजिक भिडियोया छायाङ्कन व दृश्य सम्पादन पूर्ण महर्जनं यानादीगु दु ।

निर्देशन बिराजकाजी राजोपाध्यायं यानादीगु दु । थम्हं करीब १५ दँ लिपा म्यूजिक भिडियो निर्देशन ख्यलय् पुनरागमन यानागु राजोपाध्यायं धयादिल ।

‘न्हापा नेपाल टेलिभिजनय् हसना ज्याझ्वः न्ह्याकाबलय् छुं म्यूजिक भिडियोत निर्देशन यानागु खः । आः तःदँ लिपा छपु बांलाःगु म्येया म्यूजिक भिडियो निर्देशक यायेखंगु दु, जि तसकं लयताः’ निर्देशक राजोपाध्यायया धापू खः ।

म्येया छायाङ्कन दहचोक, मातातीर्थ व येँया खुसिबुँ लागाय् यानातःगु दु ।

म्यूजिक भिडियोलय् म्येहालामि श्रेष्ठलिसें वयकःया हे तिरि मयजु रन्जु श्रेष्ठं अभिनय यानादीगु दु ।

निर्देशक राजोपाध्यायं च्वयादीगु म्येग्वःयात सुमन कपालीं लसय् हनेगुलिसें संगीत संयोजन नं यानादीगु दु ।