काठमाडौं सुनचाँदी व्यवसायी संघय् थौंकन्हय् तिनि क्वचाःगु महाधिवेशनं निर्विरोध निर्वाचित जूगु न्हूगु कार्य समितियात शाक्य महाविहार संघं भिंतुना देछाःगु दु ।

संघया नवनिर्वाचित नायः रोहिनादेवी शाक्य लगायतयात येँदेया शाक्य कुलया झिगू बहाःया मंका संगठन शाक्य महाविहार संघं भिन्तुना देछाःगु खः ।

ज्याझ्वलय् व्यवसायी संघया नायः शाक्यलिसें न्वकू उपेनकाजी शाक्य व छ्यान्जे लेखरत्न शाक्ययात नेवाः तजिलजि कथं ख्येँय् सगं बियाः भिन्तुना देछाःगु खः ।

ज्याझ्वलय् न्ववासें व्यवसायी संघया नायः रोहिना शाक्यं लुँ वहःया ज्याया परम्परायात म्वाकातःपिं व न्ह्याकावःपिं शाक्य कुलयापिं हे खः धासें थौंकन्हय् थ्व ख्यलय् शाक्यत व नेवाःत म्ह्वः जुयावःगुलिइ चिन्ता प्वंकादिल ।

अथेहे, न्वकू उपेनकाजी शाक्यं लुँ वहःया व्यवसाययात व्यवस्थित याना यंकेगुपाखे संघया पलाः अझ क्वातुका यंकेगु प्रतिवद्धता प्वंकादिल ।

व्यवसायी संघया छ्यान्जे लेखरत्न शाक्यं लुँवहया तिसा दयेके मं दुपिं शाक्य परिवारया ल्यायम्ह पुस्तायात माःकथं ग्वाहालि यायेगु व प्रशिक्षण बीगु खँ तयादिल ।

शाक्य महाविहार संघपाखें संघया नायः शुभकाजी शाक्य, मूछ्यान्जे संघरत्न शाक्यं थःथःगु बिचाः तसें व्यवसायी संघया न्हूगु कार्य समितियात सफल कार्यकालया भिन्तुना देछानादिल ।