सामसुंङं ग्यालेक्सी बुक फोर सिरिज ल्यापटप सार्वजनिक याःगु दु ।

शुक्रबाः दक्षिण कोरियाय् छगू ज्याझ्व यासें सामसुंङं स्वताजि ग्यालेक्सी बुक फोर सिरिज सार्वजनिक याःगु खः । थ्व अन्तर्गत ग्यालेक्सी बुक ४ अल्ट्रा, ग्यालेक्सी बुक ४ प्रो व ग्यालेक्सी बुक ४ प्रो ३६० दु ।

थ्व दक्वं ल्यापटपय् इन्टेल कोर अल्ट्रा नाइन प्रोसेसर व एनभिडियायागु जी–फोर्स आरटीएक्स ४०७० जीजीयू नापं एआईया नितिं न्यूरल प्रोसेसिङ युनिट (एनपीयू) जडान यानातःगु दु । थ्व स्वंगुलिं सिरिजय् एआई सकृय यानातःगु जुयाः प्रयोगकर्तायागु उत्पादकत्व व गतिशीलता थहां वनीगु कम्पनिं दाबी याःगु दु ।

सामसङं फुक्कं मोडलय् सेन्ट्रल प्रोसेसिङ युनिट (सीपीयू), ग्राफिक्स प्रोसेसिङ युनिट (जीपीयू) सुधार यानागु व थप यानागु धाःगु दु ।

सार्वजनिक जूगु ग्यालेक्सी बुक फोर अल्ट्रा व ग्यालेक्सी बुक फोर प्रो ३६० यागु डिस्प्ले १६ इन्च व ग्यालेक्सी बुक फोर प्रो १४ इन्चयागु दु । अथेहे स्क्रिन डिस्प्ले धाःसा भिजन बुस्टरलिसेँ डाइनामिक एमोलेड टू एक्स टच दु ।

बुक फोर अल्ट्राय् धाःसा एनभिडिया डीप लर्निङ सुपर स्याम्पलिङ (डीएलएसएस) प्रविधि तःगु दु, गुकिं गेम व एपया नितिं उच्च गुणस्तरया किपा तयार याइगु धाःगु दु । सुरक्षाया नितिं कम्पनीं ल्यापटपय् थःगु हे सामसुङ नक्स सेक्युरिटी चिप तःगु दु ।

अथेहे सः (अडियो) या लागिं सामसुङं एकेजी क्वाड स्पिकर तइगु जूगु दु । थुकिया नापं थ्व फुक्कं मोडलय् सामसुङ स्टुडियो, फोटो रिमास्टर व सेकेन्ड स्क्रिन लिसेंया फिचर दइगु धाःगु दु ।

थ्व ल्यापटप आःयात बजारय् धाःसा मवःनि । थुकिया बिक्रीवितरण २०२४ निसेँ न्ह्याइगु अनुमान याःगु दु । लिसें, कम्पनीं ल्यापटपयागु भाः नं सीदयेकुगु मदुनि । थुकिया भाः १५०० डलर (निगु लख नेपाली तका) निसेँ न्ह्याइगु धाःगु दु ।