यलया ऐतिहासिक नगरी बुंगया गायक श्यामकृष्ण तुलाधर व नांजाःम्ह गायिका निशा देशारं हालातःगु ज्वः म्ये ‘समयबजि नयेबलय्’ सार्वजनिक जूगु दु ।

बुधबाः यलया बुङ्गमतिइ जूगु छगु ज्याझ्वलय् यल वडा २२ या वडाध्यक्ष सागर तुलाधरं म्ये सार्वजनिक यानादिल ।

ज्याझ्वलय् न्ववासें यल महानगरपालिका वडा २२ या वडाध्यक्ष तुलाधरं बुंगय् नं  कलाकारिता ख्यलय् न्ह्यज्यानाच्वंपिं बांलाःपिं कलाकार दुगु खँय् लसता प्वंकुसें कलाकारिता ख्यःया विकासया नितिं वडा व थःपाखें फूचाः कथं ग्वहालि यायेगु बचं बियादिल ।

ज्याझ्वलय् नेपालभाषाया न्हापांम्ह म्युजिक भिडियो निर्देशक लिसें वरिष्ठ सिने पत्रकार विजयरत्न असंबरें म्येया समीक्षा यानादीगु खः ।

अथेहे, लोकंह्वाःम्ह कलाकार यमन श्रेष्ठ व म्येहालामि निशा देसार लगायतं थःथःगु नुगःखँ तयादीगु खः ।

सार्वजनिक जूगु म्ये ‘समयबजि नयेबलय्’या संगीतकार व रचनाकार नं गायक तुलाधर हे खः ।

शैलेश श्रेष्ठ लुभुं छायाङ्कनया ज्या यानादीगु म्यूजिक भिडियाेया दृश्य सम्पादन अमर चित्रकारं यानादीगु खः ।

म्यूजिक भिडियोलय् मनोज महर्जन व सोनिया तुलाधरं मू भुमिकाय् अभिनय यानादीगु दु । म्यूजिक भिडियोया परिकल्पनाकार व निर्देशक सुजन बज्राचार्य खः ।