हिमालयन हेन्ड्रिक्स नामं म्हस्यूम्ह नेपाली ब्लुज गायक अशेष डंगोलया टोलीं जाजरकोटया भुखाय् पिडितयात राहत इंगु दु । अमर क्षेत्री फाउण्डेशनया ग्वहालिइ डंगोलया टोलीं जाजरकोटय् राहत इंगु खः ।

वंगु फागुन ८ गते मंगलबाः जाजरकोट जिल्लाया नलगाड नगरपालिका वडा १० रग्दाया स्थानीय भुखाय् पिडिततयत राहत इंगु खः ।

जाजरकोट रग्दाया स्थानीय वासिन्दा थौंतक नं बिजुलीया सुविधां बञ्चित जुयावःगु दु ।

राहत इनेत कलाकार डंगोलया टोलीइ पत्रकार रीदेन महर्जन, देवी राना, नितेश ढकाल जाजरकोट वंगु खः ।

टोलीं जाजरकोटया नलगाड नगरपालिका भुखाय् प्रभावित क्षेत्रया स्थलगत भ्रमण यानाः रग्दाया करिब ६० छेँया ९३सः स्वयां अप्वःसित फायेगु सिलः इंगु खः । लिसें १६ मचा बूपिं मिसातयत न्ययेगु गा नं ब्यूगु खः ।

लिसें आर्थिक अवस्था कमजोर परिवारयात नयेगु नसा ज्वलंलिसें आर्थिक ग्वहालि नं ब्यूगु खः ।

राहत इनेज्याझ्वलय् स्थानीय कलाकार राम बहादुर नेपालीया साथ कयाः कलाकार डंगोलं गितार थानाः थःगु न्हूगु म्ये हालाः न्यंकूगु खः । व झ्वलय् कलाकार डंगोल व नेपालीयात मादलय् अशोक रावतं साथ ब्यूगु खः ।

रग्दा थुज्वःगु विकट थासय् इतिहासय् हे न्हापांगु खुसी सांगितिक ज्याझ्वः जूगु खः ।

व हे क्षेत्रय् भुखाचं जीर्ण अवस्थाय् दुगु श्री जन एकता प्राथमिक ब्वनेकुथिइ ब्वनाच्वंपिं सछिम्ह विद्यार्थीतयत गाक्क स्टेशनरी हलंज्वलं नं ब्यूगु खः ।