रत्न बेहोशीया पुलांगु म्ये ‘भत्ति ख्वं ड्राइभर’ न्हूगु पहलं पिदनः म्यूजिक भिडियाेनापं
eBukhan – ईबुखँ डेस्क, २०८१ आश्विन २३, बुधबार वर्गीकृत मनोरञ्जन
नेवाः संगीत ख्यलय् कायमचा ल्यायम्ह जूगु स्वयेबलय्, राजमहलया न्ह्यइपु बजारय् थुज्वःगु म्ये बियादीम्ह वरिष्ठ लोक गायक रत्न बेहोशीया छपु पुलांगु म्ये न्हूगु पहलं पिदंगु दु ।
वरिष्ठ लोक गायक बेहोशीं च्वयादीगु, लसय् हनादीगु पुलांगु छपु म्ये ‘भत्ति ख्वं ड्राइभर’ न्हू कथं रेकर्डिङ जुयाः पिदंगु खः ।
गायक कृष्ण महर्जन व सरस्वती मानन्धरया सलय् थुगु म्येया म्यूजिक भिडियो सार्वजनिक जूगु खः ।
वंगु मंगलबाः (असोज १५) नेवाः टिभिया लाइभ ज्याझ्वलय् थुगु म्येया म्यूजिक भिडियो सार्वजनिक याःगु खः ।
टिभि ज्याझ्वलय् वरिष्ठ लोक गायक बेहोशीलिसें वरिष्ठ सिने पत्रकार विजयरत्न असंबरे, पत्रकार बिराजकाजी राजोपाध्यायं म्ये प्ले यानाः म्ये सार्वजनिक यानादिल ।
ज्याझ्वलय् न्ववासें वरिष्ठ लोक गायक बेहोशीं थःगु पुलांगु म्ये न्हूगु पहलं पिहांवःगुलिइ लसता प्वंकुसें थः न्ह्याबलें संगीत श्रृजनाय् सक्रिय जुयाच्वनेगु धयादिल ।
वरिष्ठ सिने पत्रकार विजयरत्न असंबरें म्ये व म्यूजिक भिडियोया समीक्षा यासें नेवाः संगीत ख्यलय् छपु न्ह्यइपूगु व बांलाःगु म्ये पिदंगु बिचाः तयादिल ।
पत्रकार बिराजकाजी राजोपाध्यायं भाषा, साहित्य, कलाया मायां न्ह्यज्यानाच्वंपिं नेवाः संगीतकःमितयत हःपाः बीगु नितिं स्वकुमितयत इनाप यानादिल ।
सुरेन्द्र मानन्धरं निर्देशन यानादीगु म्युजिक भिडियोलय् सरस्वति मानन्धर, भिन्तुना जोशी व अष्ट महर्जनलिसें शान्त प्रजापति, राधेश्याम श्रेष्ठ, सोनी महर्जन, राम मैनाली, उमेश पाण्डे अभिनय यानादीगु दु । ।
म्येया छायाङ्कन बालकुमार मगरं यानादीगु दुसा दृश्य सम्पादन इन्द्र मानन्धरं यानादीगु दु ।
