म्येहालामि राजेन्द्र सुवालया म्ये ‘जि ला थौं ससः याकनं हे थ्यंका’ या म्यूजिक भिडियो सार्वजनिक जूगु दु । म्येहालामि सुवालया उगु म्यूजिक भिडियो थौं (सोमबाः) अडियो नेपालया युट्युब च्यानलय् सार्वजनिक जूगु खः ।

ईमेज च्यानलय् छगू इलय् प्रसारण जुयाः ल्वकं ह्वाःगु ज्याझ्वः ‘समयबजि’ या निर्देशकलिसें ज्याझ्वः न्ह्याकामि सुरेन्द्र मानन्धरं थुगु म्यूजिक भिडियोया निर्देशन यानादीगु दु ।

ख्यालिन्हिलि ख्यलय् नांजाःम्ह निर्देशक मानन्धरं थुगु म्यूजिक भिडियो नं ख्यालि पहलं हे दयेकागु जानकारी बियादिल ।

म्यूजिक भिडियोलय् मुख्य कलाकारया रुपं महेन्द्र खड्गीं जिचादाजु व मीरा डंगोलं ससःकेहेँया भूमिका म्हितादीगु दु ।

अथेहे पुरु श्रेष्ठ, रन्जना श्रेष्ठ, सरिता श्रेष्ठ थापा व निर्देशक सुरेन्द्र मानन्धर थम्हं नं सहायक कलाकारया रुपं अभिनय यानादीगु दु ।

वरिष्ठ सिने पत्रकार विजयरत्न असंबरें छगू ज्याझ्वलय् हास्य सम्राटया उपाधि ब्यूम्ह निर्देशक मानन्धरया मुक्तक तकं थुगु म्ये न्यनेदइ ।

म्यूजिक भिडियोया मुख्य कलाकारद्वय खड्गी व डंगोलं हे थुगु म्येय् कोरीयोग्राफी नं यानादीगु दु ।

थुगु म्येया लयचिनामि बुद्ध सायमिं हे किपूया चिलंच्व विहार, बाघभैरव, जोशी ननि, नेवाः लहनालिसेंया थासय् म्येया छायाङ्कन नं यानादीगु दु ।

दृश्य सम्पादन ईन्द्र मानन्धरं यानादीगु दु ।

म्येग्वः ई संजय शाक्यं च्वयादीगु दु ।