म्येहालामि राजेन्द्र सुवालं हालादीगु म्ये ‘जि ला थौं ससः याकनं हे थ्यंका’ म्ये पिदनीगु जूगु दु । मोहनिया लसता लाकाः म्येहालामि सुवालया थुगु म्येया म्यूजिक भिडियो सार्वजनिक जुइत्यंगु खः ।

थुगु म्ये भिडियोया सुटिङ क्वचायाः आः भिज्युअल एडिटिङया लिपांगु चरणया ज्या जुयाच्वंगु म्येहालामि सुवालं कनादिल ।

‘न्ह्यइपूगु बांलाःगु म्यूजिक भिडियो दयेकेत सकसिनं मिहिनेत यानागु दु । आः छन्हु निन्हुं हे मोहनिया देछा कथं म्ये पिथनेत्यनागु दु’ सुवालं धयादिल ।

म्यूजिक भिडियोया निर्देशन थौंकन्हय् व्यस्तम्ह म्यूजिक भिडियो डाइरेक्टर सुरेन्द्र मानन्धरं यानादीगु दु । ख्यालि पहःया म्येयात ल्वयक ख्यालिन्हिलिं जाःगु म्ये हे दयेकागु निर्देशक मानन्धरं कनादिल ।

‘म्येग्वः कथं, म्येया भाव कथं ससःकेहेँ, जिचादाजुया ख्याः, तं न्ह्यब्वयाः न्ह्यइपूगु ख्यालि म्ये दयेकेत स्वयागु दु, म्ये स्वयाः कमेन्ट यानादीत सकसित इनाप यानाच्वना’ निर्देशक मानन्धरं धयादिल ।

म्यूजिक भिडियोलय् मुख्य कलाकारया रुपं महेन्द्र खड्गी व मीरा डंगोलं अभिनय यानादीगु दुसा सरीता श्रेष्ठ थापा व पुरु श्रेष्ठं नं अभिनय यानादीगु दु । अथेहे, डान्सय् शान्ता महर्जन व आरती नेपालीं साथ बियादीगु दु ।

म्यूजिक भिडियोया दृश्य सम्पादन ईन्द्र मानन्धरं यानाच्वनादीगु दु । किपूया चिलंच्व विहार, जोशी ननि, बाघभैरव व नेवाः लहनालिसेंया थासय् बुद्ध सायमिं म्येया छायाङ्कन यानादीगु दु ।

म्येया रचनाकार ई. संजय शाक्य खःसा संगीत बुद्ध सायमिं बियादीगु दु ।