नेपाल प्रज्ञा प्रतिष्ठानं २०८० सालया नितिं थीथी प्राज्ञिक क्षेत्रय् बियावःगु थीथी प्रज्ञा सिरपाः कन्हय् बुधबाः बीत्यंगु दु ।

दँयदसं बियावःगु सिरपालय् छुं संशोधन व छुं थप यासें कन्हय् बुधबाः सिरपाः लःल्हायेत्यनागु प्रज्ञा प्रतिष्ठानं धाःगु दु ।

प्रतिष्ठानं छगू विज्ञप्ती जारी यासें थीथी झिगू विधाय् झिम्हेसित सिरपाः लःल्हायेत्यनागु धाःगु खः ।

थुगुसीया नितिं बीगु थीथी सिरपालय् प्रज्ञा अनुवाद सिरपाः खगेन्द्र संग्रौलायात, प्रज्ञा दर्शन सिरपाः मोहन विक्रम सिंहयात व प्रज्ञा सामाजिकशास्त्र सिरपाः शान्ता श्रेष्ठयात बीत्यंगु दु ।

अथेहे, प्रज्ञा संस्कृति लोकवार्ता तथा मौखिक इतिहास सिरपालं घनश्याम शर्मा पौडेल, प्रज्ञा समालोचना तथा साहित्येतिहास सिरपालं कृष्ण गौतम व प्रज्ञा भाषा सिरपालं प्रा.डा.देवीप्रसाद गौतम पुरस्कृत जुइत्यंगु दु ।

प्रज्ञा साहित्य सिरपाः पद्यपाखे बम देवान व गद्यपाखे राजव, प्रज्ञा बाल साहित्य सिरपाः गंगा कर्माचार्य, प्रज्ञा अन्तरदेशीय सिरपाः पदम विश्वकर्मायात लःल्हायेगु प्रज्ञा प्रतिष्ठानं धाःगु दु ।

दँयदसं बीगु थुगु दक्वं सिरपाःया राशी म्हतिं छगू लख तका दु ।

प्रज्ञा मातृभाषा साहित्य सिरपाः २०८० पहाडी/हिमाली क्षेत्रं डा. योगेन्द्रमान प्रधानाङ्ग व तराई/मधेस क्षेत्रं बेचन उराँवयात अन्तर्राष्ट्रिय मातृभाषा दिवस २०२४ या लसताय् लःल्हायेधुनागु प्रतिष्ठानं धाःगु दु ।

कन्हय् न्हिनय् १ताः इलय् प्रज्ञा प्रतिष्ठानया लेखनाथ हलय् छगू ज्याझ्वः यानाः थुगु सिरपाःत लःल्हायेगु प्रतिष्ठानं जानकारी ब्यूगु दु ।