न्हू दिल्ली । नेवाः पत्रकारतय् कुसा संगठन नेवाः पत्रकार राष्ट्रिय दबूया केन्द्रीय नायः नृपेन्द्रलाल श्रेष्ठ भारतया न्हू दिल्लीइ पत्रकारिता सिरपालं पुरस्कृत जूगु दु ।

लहना वाःपौया प्रकाशक व प्रधान सम्पादक तकं खःम्ह श्रेष्ठयात भारतया न्हू दिल्लीइ जूगु दक्षिण एसियाया शान्ति स्थापना व ग्वाहालिइ पत्रकारिताया भूमिका’ बिषयक अन्तर्राष्ट्रिय सम्मेलनय् सिरपाः ब्यूगु खः ।

न्हू दिल्लीस्थित भारतीय विद्यापीठ व सार्क जर्नलिस्ट फोरम इण्डिया चाप्टरं याःगु सम्मेलनय् थुगुसीया युगल किशोर शुक्ला अन्तर्राष्ट्रिय पत्रकारिता सिरपाः श्रेष्ठलिसें भारतया शशिभुषण कुमारयात नं लःल्हाःगु खः ।

थुगु सिरपाः सार्क जर्नालिष्ट फोरम भारत च्याप्टरं स्थापना याःगु खः ।

उगु हे ज्याझ्वलय् राजु लामा, अब्दुर रहमान, राहुल सामन्था, रुद्र सुवेदी, सदाव मालिक, दिपेन्द्र प्रजापती, शैलेश साह कानु, अभिलाष गुप्ता, अजमत अलिलिसेंया पत्रकारतयत नं अन्तर्राष्ट्रिय पत्रकारिता सिरपाः लःल्हाःगु खः ।

सम्मेलनय् नेपाल, भारत, श्रीलङ्का, बङ्गलादेश, पाकिस्तान, भुटानलिसेंया देशं मुंपिं पत्रकारतय् दथुइ बृहत सहलह जूगु खः ।

भारतीय विद्यापीठया निर्देशक प्रोफेसर एम एन होदाया अध्यक्षताय् जूगु ज्याझ्वलय् सार्क जर्नलिस्ट फोरमया अन्तर्राष्ट्रिय नायः राजु लामा, मू छ्यान्जे मो।अब्दुर रहमान, दुजः इस्मिता मिश्रा, श्रीलङ्का चाप्टर नायः राहुल सामन्था, इण्डिया चाप्टर नायः अनिरुद्ध सुधांशुलिसें नं न्ववाःगु खः ।

ज्याझ्वलय् फोरमया अन्तर्राष्ट्रिय दुजः भुटानया रिन्जिन वाङचुक व पाकिस्तान च्याप्टरया मूछ्यान्जे हुश्नयन चौधरीं भिडियो हसनामार्फत ज्याझ्वलय् थःगु खँ तःगु खः ।

ज्याझ्वःया बक्तातयसं सार्क क्षेत्रय् शान्ति स्थापना यायेत हाथ्या दुसां पत्रकारिताया माध्यमं फक्व कुतः यायेमाःगुलिइ बः ब्यूगु खः ।