वरिष्ठ साहित्यकार लिसें कलाकार गणेशराम लाछिं च्व्यादीगु प्यंगू सफू छक्वलं सार्वजनिक जूगु दु ।

मध्यपुर थिमि नगरपालिकाया नगरप्रमुख सुरेन्द्र श्रेष्ठ, नेपाल भाषा एकेडेमीया चान्सलर मल्ल के. सुन्दर व भाषा आयोगया दुजः सुरेशकिरण मानन्धरं शनिबाः थिमिइ छगू समारोहया दथुइ लाछिया प्यंगू सफू विमोचन यानादिल ।

ज्याझ्वलय् लाछिं च्वयादीगु नेपालभाषाया निगू कृति ‘हेङ्ग्वाः जुम्ह मनू’ (उपन्यास) व “कयता तंम्ह नेवाः’ नाटक लिसें खस भाषाया ‘सिक्किम यात्राको सेरोफेरो’ संस्मरण व ‘अमुर्त सम्पदाभित्र’ लिसेंया प्यंगू सफू सार्वजनिक जूगु खः ।

मध्यपुर थिमिस्थित दबुली नेपालं ग्वसाः ग्वःगु समारोहस प्यम्ह वरिष्ठ साहित्यकारयात सम्मान नं याःगु खः ।

‘तेजकृष्ण नानिमाया लुमन्ति हना’ सिरपालं पोखराया तीर्थ श्रेष्ठ, ख्वपया गुण्डुया अभय श्रेष्ठ, पनौतीया सूर्यप्रसाद लाकोजु व लोकन्थली थिमिया रत्न प्रजापति सम्मानित जूगु खः ।

नेपाली साहित्यया थीथी विधाय् प्यंगू दशक स्वयां ताः इलनिसें च्वसा न्ह्याकाच्वंपिं वरिष्ठ साहित्यकारतय् योगदानयात च्वछासें भविष्यय् थःगु मातृभाषां नं साहित्यिक रचना याकेगु आज्जुं सम्मान यानागु दबुली नेपालया नायः ई. सन्तोष प्रजापतिं धयादिल ।

समारोहस सम्मानित वरिष्ठ प्यम्ह साहित्यकारतयत मध्यपुर थिमिया नगरप्रमुख श्रेष्ठ, नेपालभाषा एकेडेमिया चान्सलर मल्ल व भाषा आयोगया दुजः मानन्धरं ढाका तपुलि, दोसल्ला व हनापौलिसें हनादीगु खः ।

दबुली नेपालं २०७४ सालनिसें कलासंस्कृति, इतिहास, परम्परा, लोक वाद्यवादन, मांभाय्, अमुर्त सम्पदा संरक्षण व प्रबद्र्धनय् थीथी ज्याखँत न्ह्याकावःगु दु ।